Патрэбны «рашучы адказ», лічыць Міністэрства.
Міністэрства замежных справаў Польшчы заклікала ўвесці новыя санкцыі супраць лукашэнкаўскага рэжыму. Гэта рэакцыя на хвалю маштабных рэпрэсіяў у Беларусі.
«Масавыя затрыманні былых вязняў сумлення і сем’яў палітвязняў, якія ажыццяўляюцца ўладамі Беларусі, патрабуюць рашучага адказу. Наступны пакет санкцыяў супраць Беларусі мусіць быць прыняты як мага хутчэй», – піша МЗС Польшчы ў сацыяльнай сетцы X.
Апошнімі днямі ў Беларусі яшчэ больш узмацніліся рэпрэсіі. Цяпер сілавікоў асабліва цікавяць былыя палітвязні і сваякі палітвязняў. Верагодна, гэта звязана з падтрыманнем, якое беларусы працягваюць аказваць адно аднаму, незалежна ад таго, застаюцца яны ў краіне ці выехалі за мяжу. 23 студзеня КДБ учыніў чыстку, у выніку якой прайшлі праз ператрусы, допыты або арышты сама меней 84 асобы. 24 студзеня стала вядома, што сілавікі арыштоўваюць і былых журналістаў.
Пакет новых санкцыяў супраць Расеі будзе абмяркоўвацца ў лютым. У сувязі з гэтым Польшча, Эстонія, Латвія, Літва прапануюць узмацніць санкцыі супраць Беларусі і зраўнаваць іх з галіновымі абмежаваннямі ў дачыненні Расеі.
Арсен Рудэнка belsat.eu
