Пра галоўныя падзеі станам на вечар 24 студзеня чытайце ў нашым аглядзе.
«Белсат» падводзіць вынікі 700-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 24 студзеня чытайце ў нашым аглядзе.
На паўночным усходзе Харкаўскай вобласці асноўная актыўнасць зноў лакалізаваная ў ваколіцах сяла Сынькоўка ў Купянскім раёне, пра што сведчыць інфармацыя ад украінскага і расейскага камандаванняў.
Большая актыўнасць праціўнікаў адзначаецца на суседнім ліманскім кірунку.
У Генеральным штабе Збройных сілаў Украіны паведамілі пра чатыры адбітыя атакі праціўніка каля сёлаў Ямпалаўка і Церны на поўначы Данецкай вобласці і дзве – у ваколіцах Белагораўкі і на тэрыторыі Серабранскага лясніцтва на Луганшчыне.
Між тым прарасейскі тэлеграм-канал «Два майора» сцвярджае, што УС РФ усё ж занялі некаторыя пазіцыі каля Белагораўкі.
Пры гэтым самыя ЗСУ, паводле Мінабароны РФ, атакавалі ў ваколіцах населеных пунктаў Церны і Ямпалаўка, але поспеху не дасягнулі.
На бахмуцкім кірунку ініцыятыва застаецца за расейскімі вайскоўцамі, якія цягам апошніх содняў наступалі каля населеных пунктаў Багданаўка, Іванаўскае і Клішчыеўка, імкнучыся прасунуцца да гораду Часаў Яр.
Канал «Два майора» піша, што войскі РФ прасунуліся каля Багданаўкі ў бок суседняга сяла Грыгораўка.
Расейскі ваенкор Сямён Пегаў гаворыць пра поспехі Узброеных сілаў РФ у ваколіцах Іванаўскага.
Між тым вайскоўцы ЗСУ, якія абараняюцца на гэтым участку фронту, адмаўляюць змены лініі фронту, хоць і прызнаюць наяўнасць цяжкіх баёў.
Наступальная актыўнасць саміх Збройных сілаў Украіны фіксуецца на самым поўдні кірунку ў ваколіцах сяла Шумы (на паўночным захадзе ад Горлаўкі): Мінабароны РФ паведаміла пра дзве няўдалыя атакі ўкраінцаў.
Самыя актыўным участкам фронту застаюцца ваколіцы Данецку, але і тут назіраецца адносны спад актыўнасці расейскіх вайскоўцаў.
Па інфармацыі ўкраінскага камандавання, на аўдзееўскім кірунку за апошнія содні сілы абароны краіны адбілі 16 атак расейцаў у ваколіцах Новаміхайлаўкі, Первамайскага, Невельскага і самой Аўдзееўкі.
Сямён Пегаў адзначае, што на паўднёвым усходзе гораду ідуць цяжкія сустрэчныя баі – ЗСУ контратакуюць, імкнучыся ліквідаваць ранейшыя прасоўванні праціўніка. Гэтую інфармацыю пацвярджаюць і іншыя крыніцы.
На мар’інскім кірунку наступальная актыўнасць расейскіх вайскоўцаў засяроджаная на ўчастку фронту паміж населенымі пунктамі Георгіеўка і Новаміхайлаўка.
Генштаб ЗСУ піша пра 16 няўдалых атак праціўніка за содні.
Самыя ўкраінскія байцы гавораць, што расейцы, не здолеўшы прарваць абарону ЗСУ ў ваколіцах Новаміхайлаўкі, паступова змяшчаюць вектар сваіх атак на поўнач і поўдзень ад сяла. Адзін удар ідзе паміж сёламі Пабеда і Георгіеўка, іншы – па лініі Салодкае – Вадзяное.
Пры гэтым адзначаецца, што войскі РФ маюць дастаткова сілаў і сродкаў для абедзвюх аперацыяў.
На поўдні Украіны расейцы зноў атакавалі каля сяла Чырвонае ў Запарожскай вобласці (на ўсходзе ад гораду Гуляйполе), але сілы абароны Украіны ўтрымалі свае пазіцыі.
Пры гэтым найбольш гарачым участкам фронту ў рэгіёне застаюцца ваколіцы гораду Арэхаў. Тут працягваюцца сустрэчныя баі каля населеных пунктаў Вэрбовае і Работына. Пегаў адзначае, што лінія фронту каля сёлаў даволі дынамічная, але істотных зменаў не фіксуецца.
У Херсонскай вобласці баявыя дзеянні лакалізуюцца на левым беразе Дняпра, дзе ЗСУ ўтрымліваюць некалькі невялікіх плацдармаў.
Украінскі бок паведамляе пра сем безвыніковых штурмавых дзеянняў праціўніка за содні.
Прарасейскі тэлеграм-канал «Romanov Лайт» адзначае паляпшэнне лагістыкі ўкраінцаў на Дняпры, што звязана з нядаўнім знішчэннем групы аператараў БпЛА РФ.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
