Выглядае, што ў данатах на 50 долараў знайшлі «паўторнае фінансаванне экстрэмізму».
Менскі гарадскі суд агучыў вырак палітвязню Андрэю Савінскаму: за «распальванне варожасці» і «фінансаванне экстрэмісцкай дзейнасці» суддзя Вера Галаўкова прысудзіла яму 5 гадоў калоніі ўзмоцненага рэжыму і штраф 7400 рублёў, піша «Вясна».
Андрэя Савінскага спачатку затрымалі за «экстрэмісцкія матэрыялы» і асудзілі на 15 дзён арышту. Але не вызвалілі, перавялі ў следчы ізалятар № 1. Яго судзілі з 26 кастрычніка па 15 лістапада 2023 года, але вынік суду стаў вядомы толькі цяпер.
Паводле абвінавачвання, Савінскі перавёў праз Facebook суму каля 50 долараў фондам, названым уладамі «экстрэмісцкімі». Таксама ў адным з Telegram-чатаў ён, як сцвярджаецца ў абвінавачванні, напісаў чатыры паведамленні, «скіраваныя на распальванне сацыяльнай варожасці».
За «фінансаванне экстрэмісцкай дзейнасці» яму прысудзілі тры гады пазбаўлення волі, а за паўторнае «фінансаванне» (выглядае, у межах тых жа 50 долараў) – пяць гадоў і штраф у 7400 рублёў. Таксама прысудзілі тры гады за «распальванне варожасці». У суме прысудзілі пяць гадоў калоніі ўзмоцненага рэжыму і штраф.
Паводле звестак праваабаронцаў, Савінскага цяпер трымаюць у магілёўскай турме № 4. Праваабаронцы прызналі яго палітвязнем яшчэ 7 снежня 2023 года.
Алесь Наваборскі belsat.eu
