Вайна ва Украіне. Падсумоўваем асноўныя падзеі на вечар 28 студзеня.
«Белсат» падводзіць вынікі 704-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 28 студзеня чытайце ў нашым аглядзе.
Купянскі і ліманскі кірункі (паўночна-ўсходняя частка Харкаўскай вобласці, захад Луганскай і поўнач Данецкай)
Ранкам 28 студзеня аналітыкі праекту Deepstate пацвердзілі ранейшую інфармацыю прарасейскіх крыніцаў пра захоп Узброенымі сіламі РФ сяла Табаеўка ў Харкаўскай вобласці. Адзначаецца, што цяпер расейцы замацоўваюцца на новых пазіцыях і адначасова з гэтым намагаюцца развіць поспех у бок суседняга сяла Пясчанае.
Тэлеграм-канал «Рыбарь» піша, захоп Табаеўкі быў пытаннем часу, паколькі пад кантролем расейцаў знаходзілася панавальная вышыня побач з населеным пунктам. Па словах крыніцы, акрамя гэтага войскі РФ занялі некалі апорных пунктаў ЗСУ на поўначы і поўдні ад Табаеўкі.
Таксама фіксуюцца атакі расейцаў каля населеных пунктаў Катляроўка і Сынькоўка.
Між тым іншыя прарасейскія крыніцы паведамляюць, што УС РФ прасунуліся на поўначы ад Табаеўкі і замацаваліся ў цэнтры сяла Кіслоўка, а таксама зайшлі ў паўночна-ўсходнюю частку Катляроўкі. Пры гэтым сцвярджаецца, што ў ЗСУ пасыпаўся фронт, і яны адступаюць.
На ліманскім кірунку, паводле ўкраінскага камандавання, Узброеныя сілы РФ 11 разоў атакавалі каля населеных пунктаў Церны, Ямпалаўка, Торскае і Белагораўка, але поспеху не дасягнулі.
У Міністэрстве абароны РФ фіксуюць атакі ЗСУ каля Ямпалаўкі, Цернаў і Дзібровы – таксама без зменаў па лініі фронту.
Бахмуцкі кірунак (лінія фронту ў ваколіцах аднайменнага гораду ў Данецкай вобласці)
На бахмуцкім кірунку наступальныя дзеянні расейцаў зафіксаваныя ў ваколіцах населеных пунктаў Іванаўскае, Клішчыеўка, Андрэеўка і Багданаўка.
Расейскі ваенкор Сямён Пегаў гаворыць, што каля Іванаўскага і Багданаўкі расейцы крыху прасунуліся.
Пры гэтым тэлеграм-канал «Romanov Лайт» сцвярджае, што УС РФ штурмуюць самое Іванаўскае. Цераз гэтае сяло праходзіць траса Бахмут – Канстанцінаўка, кантроль над якой неабходны расейцам для далейшага прасоўвання да гораду Часаў Яр.
Паводле Мінабароны РФ, ЗСУ атакавалі каля Паўночнага і Шумаў (на захадзе ад гораду Горлаўка), але поспеху не мелі.
Аўдзееўскі і мар’інскі кірункі (на поўначы і захадзе ад Данецку)
Узброеныя сілы РФ валодаюць ініцыятывай і ў ваколіцах Данецку.
На аўдзееўскім кірунку, паводле Генштабу ЗСУ, цягам апошніх содняў сілы абароны краіны адбілі 11 атак праціўніка каля Стэпавога і Аўдзееўкі, а таксама яшчэ 17 – у ваколіцах Танэнькага, Первамайскага і Невельскага.
Між тым аналітыкі Deepstate пішуць, што расейскія вайскоўцы прасунуліся на поўдні Аўдзееўкі.
На мар’інскім кірунку УС РФ не менш за 14 разоў атакавалі каля Георгіеўкі і Новаміхайлаўкі, але зменаў лініі фронту не зафіксавана.
Бярдзянскі, мелітопальскі і херсонскі кірункі (лінія фронту на поўдні Данецкай вобласці, а таксама ў Запарожскай і Херсонскай вобласцях)
На поўдні Данецкай вобласці расейцы праводзяць спарадычныя атакі каля населеных пунктаў Залатая Ніва і Старамаёрскае, але пакуль Збройным сілам Украіны ўдаецца ўтрымліваць свае пазіцыі.
У Міністэрстве абароны РФ заявілі пра няўдалую атаку саміх украінцаў у ваколіцах сяла Прыютнае на мяжы Запарожскай і Данецкай вобласцяў.
У цэнтральнай частцы Запарожскай вобласці баявыя дзеянні лакалізуюцца на выступе па фронце з поўдня ад гораду Арэхаў. Сямён Пегаў гаворыць, што тут ЗСУ вярнулі шэраг пазіцыяў на захадзе ад сяла Работына. Пры гэтым расейцы атакуюць з боку Навапрокапаўкі і Вэрбовага.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
