У акцыі прынялі ўдзел некалькі дзясяткаў чалавек.
Акцыя Ланцуг салідарнасці з ахвярамі новага вітка рэпрэсій у Беларусі адбылася 28 студзеня ў Вільні.
Некалькі дзясяткаў чалавек выстраіліся ў ланцуг уздоўж праспекта Гедыміна ў цэнтры Вільні каб выказаць сваю салідарнасць з сваякамі палітзняволеных, у якіх прайшлі ператрусы і затрыманні.
Нагадаем, 23 студзеня па ўсёй Беларусі супрацоўнікі КДБ учынілі масавыя ператрусы, допыты і затрыманні сваякоў і блізкіх палітвязняў, а таксама былых палітзняволеных, якія нядаўна выйшлі з месцаў зняволення і заставаліся жыць у краіне. У пастановах на ператрусы былі пазначаныя артыкулы 361-2 («Фінансаванне экстрэмісцкай дзейнасці») і 361-1 («Удзел у экстрэмісцкім фармаванні») Крымінальнага кодэксу РБ. Некаторых потым судзілі па адміністратыўных справах.
Прычынай зацікаўленасці з боку КДБ стала дапамога семʼям палітвязняў ад ініцыятывы «INeedHelpBY», якую днямі ўлады прызналі «экстрэмісцкім фармаваннем».
Паводле праваабаронцаў, усяго ў рамках рэйду сілавікоў пад пераслед трапілі мінімум 165 чалавек.
Глеб Нержын belsat.eu
