Мужчына кажа, што проста не ведаў, што песня ў «экстрэмісцкім» спісе.
У Наваполацку пакаралі 15 соднямі арышту работніка ААТ «Нафтан» Яўгена Міхайлоўскага нібыта за «экстрэмісцкую» песню, якую ён размясціў на сваёй старонцы «ВКонтакте». Мужчына кажа, што не ведаў пра статус песні.
Прысуд вынесла суддзя Зінаіда Балаболава 12 снежня 2023 года.
«У судовым паседжанні Яўген віну прызнаў, звярнуў увагу на тое, што ён сапраўды размясціў на сваёй старонцы ў сацыяльнай сетцы “ВКонтакте” відэаролік Ігара Палынскага з назвай “Sumarok – 2020” і не ведаў пра тое, што песня была напісаная пасля затрыманняў на адным з нядзельных маршаў, якія сталі традыцыйнымі пасля прэзідэнцкіх выбараў – 2020 у Беларусі», – пішуць праваабаронцы «Віцебскай вясны».
Таксама мужчына адзначыў, што не ведаў, што ўлады ўключылі кліп у рэспубліканскі спіс «экстрэмісцкіх» матэрыялаў. Балаболава «ўлічыла» прызнанне, але пакарала мужчыну арыштам за распаўсюд «экстрэмісцкіх» матэрыялаў.
Рэспубліканскі спіс «экстрэмісцкіх» матэрыялаў рэгулярна абнаўляецца. Суды дзясяткамі ўносяць у яго сайты, старонкі і спасылкі.
Арсен Рудэнка belsat.eu
