Выбары пройдуць 25 траўня 2024 года.
Каардынацыйная рада большасцю галасоў зацвердзіла выбарчую сістэму, паводле якой пройдуць выбары ў КР, і паведаміла пра гэта ў сваім тэлеграм-канале. Таксама была вызначаная і дата правядзення выбараў – 25 траўня 2024 года.
У адпаведнасці з пастановай, выбары будуць праводзіцца паводле прапарцыйнай сістэмы з закрытымі спісамі (фіксаваны парадак, кандыдаты бачныя).
Кожны выбарнік будзе мець тры галасы і зможа аддаваць не больш за адзін голас за суб’ект, пры гэтым у бюлетэні мусіць быць не менш за адзін голас.
У выбарчай сістэме будзе прадугледжаная гендарная квота ў 40 % (у кожнай пяцёрцы кандыдатаў – не менш за дзве жанчыны) з магчымасцю зніжэння квоты да 20 % пастановай выбарчай камісіі для тых выбарчых суб’ектаў, якія абʼектыўна не могуць выканаць квоту ў 40 % (арганізацыі ў сферы бяспекі, ветэранскія і інш.).
Спіс ад самавылучэнцаў не будзе прадугледжаны. Таксама не будзе квотаў для НДА.
Як адзначаецца ў паведамленні, ліст з апісаннем абранай выбарчай сістэмы будзе накіраваны ў Офіс Святланы Ціханоўскай.
Зараз у Каардынацыйнай радзе пастаўленая на галасаванне дата правядзення выбараў.
Нагадаем, што 7 лютага аб складанні паўнамоцтваў заявіла віцэ-спікерка Кааардынацыйнай рады Алена Жываглод, бо 8 лютага мусілі скончыцца паўнамоцтвы ўсёй КР. Аднак 8 лютага КР унесла змены ў Статут і працягнула свой мандат да першага дня агульнага пасяджэння наступнага складу. Ян Рудзік вырашыў, што ў такім выпадку Статут Каардынацыйнай рады робіць яго віцэ-спікерам, бо ён заняў трэцяе месца на выбарах спікера.
8 лютага каманда Народнага антыкрызіснага ўпраўлення прыняла пастанову адклікаць з Каардынацыйнай рады свайго дэлегата Арцёма Брухана ў сувязі з завяршэннем 8 лютага паўнамоцтваў другога склікання Каардынацыйнай рады. Пры гэтым у НАУ падкрэслілі, што ўсю палітычную адказнасць за крызіс у Каардынацыйнай радзе нясе спікер КР Андрэй Ягораў.
Выбары ў КР планавалася правесці ў лютым.
Раман Шавель belsat.eu
