«Далей газавыя камеры?», – пытаецца навуковец.
Палітвязень Сцяпан Латыпаў захварэў цынгой. Гэтая хвароба прыводзіць да пакутлівай смерці, калі цела літаральна руйнуецца, а яе з’яўленне – яшчэ адно сведчанне таго, што беларускія месцы пазбаўлення волі сапраўды жудасныя. Вучоны-хімік Сяргей Бесараб патлумачыў, чаму цынга ў 21 стагоддзі – гэта абуральна.
Сцяпан Латыпаў знаходзіцца ў магілёўскай турме №4. Да арышту 15 верасня ён жыў на «плошчы Пераменаў» і спрабаваў абараніць мурал з «дыджэямі пераменаў». У жніўні 2020 года менчукі маглі бачыць Сцяпана на вуліцах гораду з ахапкамі кветак – ён раздаваў іх жанчынам. Гэтага чалавека проста цяпер забіваюць жудаснай смерцю.
«Навіна, што палітвязень Сцёпа Латыпаў у турме хварэе цынгой. ЦЫНГА (!!!) У першай чвэрці 21 стагоддзя, у краіне якая яшчэ ўчора прэтэндавала на званне IT-шнага раю, запускала касмічныя спадарожнікі і спрабавала Будаваць АЭС.
Для тых хто не ў курсе. Цынга – гэта захворванне звязанае з недахопам у арганізме вітаміну С (аскарбінавай кіслаты). Чалавек, у адрозненне ад некаторых жывёлаў гэты вітамін сінтэзаваць не ў сілах. Вітамін С не толькі дапамагае засвойваць жалеза з ежы, але, што важней за ўсё, удзельнічае ў сінтэзе калагену», – абураецца Сяргей Бесараб.
Ён тлумачыць, што калаген – гэта асноўны будаўнічы бялок у арганізме чалавека.
«Калі парушаны яго сінтэз, то пачынаюць разбурацца крывяносныя пасудзіны, храсткі, мышцы. Любыя органы дзе прысутнічае злучальная тканіна. Капіляры становяцца далікатнымі, зʼяўляюцца ўнутраныя кровазліцця, косці пачынаюць лёгка крышыцца і ламацца, рэцыдывуюць пераломы, якія зажылі. Расхістваюцца і выпадаюць зубы. Перастаюць гаіцца раны. У выніку цынга практычна заўсёды прыводзіць да пакутлівай смерці.
,,Для таго каб выявіліся сімптомы цынгі, Вітамін С павінен цалкам адсутнічаць у рацыёне хоць бы некалькі месяцаў. Адным з дасягненняў цывілізацыі можна лічыць тое, што цынга практычна цалкам выкаранена, здавалася, што яна засталася толькі ў фільмах пра піратаў.
Вітамін С як самы просты і дзейсны антыаксідант (дабаўка якая перашкаджае акісленню прадуктаў) дадаецца практычна ва ўсё. Пачынаючы з дзіцячага харчавання, і заканчваючы некаторымі лекамі для старых. Гэта значыць вітамін С – практычна ўсюдыісны. Ён ёсць нават у самых танных гародніне накшталт бульбы і капусты, ён ёсць у хваёвай ігліцы, нават у траве на вуліцы, чорт пабяры, ён ёсць. Пачуць цяпер “хварэюць цынгой” – гэта нешта падобна таму, каб убачыць жывога дыназаўра на вуліцы.
,,І вось адкрываеш беларускія навіны і чытаеш, што малады квітнеючы хлопец, альпініст і дайвер, памірае ад цынгі. Нават слова “праказа” або “чума” здзівілі б мяне менш.
Божа, што там наогул дзеецца, у гэтым праклятым пекле. Як такое ў прынцыпе магчыма? Што будзе наступным, навіна пра “іспанскі бот” або газавыя камеры?», – абураецца Сяргей Бесараб.
З моманту затрымання Сцяпан Латыпаў дзевяць месяцаў знаходзіўся ў СІЗА, дзе яго збівалі, катавалі і мучылі. 16 жніўня 2021 года яго пакаралі 8,5 гадоў пазбаўлення волі ва ўмовах строгага рэжыму і штрафам у 300 базавых велічынь. Яго абвінавацілі ў» арганізацыі і падрыхтоўцы дзеянняў, якія груба парушаюць грамадскі парадак, альбо актыўным удзеле ў іх«», супраціве супрацоўніку міліцыі або іншай асобе, якая ахоўвае грамадскі парадак«, а таксама ў»махлярстве, учыненым арганізаванай групай або ў асабліва буйным памеры«.
Прысуд вынес суддзя Аляксандр Воўк, пракурорам быў Уладзімір Рабаў.
Сцяпан Латыпаў не прызнаў віны ні па адным эпізодзе.
Арсен Рудэнка belsat.eu
