У дачыненні да іх «праводзяцца адпаведныя следчыя і працэсуальныя дзеянні».
Следчы камітэт Беларусі распавёў, што як найменш 155 супрацоўнікаў Беларускага дзяржаўнага ўніверсітэту пераводзілі грошы «экстрэмістам», піша Праваабарончы цэнтр «Вясна».
У дачыненні да гэтых людзей «праводзяцца адпаведныя следчыя і працэсуальныя дзеянні». Пра гэта стала вядома з дакладной запіскі СК «аб ліквідацыі прычын і ўмоў, якія садзейнічалі ўчыненню злачынстваў», якую ведамства даслала ў некаторыя навучальныя ўстановы.
У дакуменце Следчы камітэт пагражае тым, хто данаціў, адказнасцю паводле арт. 361-2 КК РБ(«Фінансаванне экстрэмісцкай дзейнасці»), 361-3 КК («Фінансаванні дзейнасці для ўдзелу на тэрыторыі замежнай дзяржавы ва ўзброеным фармаванні, альбо ва ўзброеных канфліктах») і 290-1 КК («Фінансаванне тэрарыстычнай дзейнасці»).
Вядома, што тым, хто данаціў, прапанавалі «яўку з павіннай», каб пазбегнуць крымінальнага пераследу. Таксама папярэджанне атрымала кіраўніцтва БДУ.
Надоечы старшыня Следчага камітэту Дзмітрый Гора распавёў, што ў 2023 годзе беларусы, каб пазбегнуць крымінальнага пераследу за данаты, заплацілі дзяржаве больш за Br 37 млн – гэта каля $ 11,5 млн.
У 2023 годзе ў пракуратуру для накіравання ў суд было перададзена больш за 1300 «экстрэмісцкіх» справаў (нагадаем, у апошнія гады слова «экстрэмізм» прадстаўнікі рэжыму Лукашэнкі выкарыстоўваюць для абазначэння любых праяваў іншадумства). Таксама летась актыўна выкарыстоўваўся інстытут «спецыяльнай дасудовай вытворчасці», у рамках якога была скончаная вытворчасць адносна 12 крымінальных справаў у дачыненні да 31 асобы.
«Рэалізуецца механізм вызвалення ад крымінальнай адказнасці асобаў, якія ажыццявілі фінансаванне экстрэмісцкай дзейнасці, аднак з’явіліся з пакаяннем і кампенсавалі прычыненую шкоду», – заявіў Гора.
Марыя Міхалевіч belsat.eu
