Вайна ва Украіне. Падсумоўваем асноўныя падзеі на вечар 19 лютага.
«Белсат» падводзіць вынікі 726-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 19 лютага чытайце ў нашым аглядзе.
На паўночным усходзе Харкаўскай вобласці сітуацыя застаецца адносна стабільнай.
Міністэрства абароны РФ піша пра шэраг адбітых атак украінцаў каля сяла Сынькоўка ў Купянскім раёне.
У сваю чаргу Генштаб ЗСУ паведамляе пра дзве безвыніковыя атакі праціўніка ў ваколіцах Табаеўкі.
Больш інтэнсіўныя баявыя дзеянні ідуць на суседнім ліманскім кірунку, дзе ініцыятывай валодаюць расейскія вайскоўцы.
Паводле ўкраінскага камандавання, цягам апошніх содняў сілы абароны краіны адбілі не менш за 10 атак каля Цернаў і Выемкі на поўначы Данецкай вобласці і каля Белагораўкі ў Луганскай.
Між тым тэлеграм-канал «Говорять Снайпер» усё ж фіксуе невялікія прасоўванні расейцаў у так званай шэрай зоны з усходу ад Цернаў.
У адказ Збройныя сілы контратакуюць на гэтым участку фронту.
На бахмуцкім кірунку расейцы наступаюць з захаду і поўдня ад аднайменнага раённага цэнтру, імкнучыся выйсці да суседняга гораду Часаў Яр.
Генштаб ЗСУ піша пра 8 няўдалых атак расейцаў каля Іванаўскага, Клішчыеўкі і Андрэеўкі.
Аналітыкі праекту Deepstate гавораць, што таксама войскі РФ шукаюць слабыя месцы ў абароне ЗСУ ў Багданаўцы.
Праўкраінскі тэлеграм-канал «Бахмутський Демон», які вядуць вайскоўцы ЗСУ, паведамляе, што праціўнік распачаў штурм сяла Іванаўскае (на паўднёвым захадзе ад Бахмуту).
У гэты ж час у Мінабароны РФ заявілі пра чатыры адбітыя атакі праціўніка на самым поўдні кірунку каля населенага пункту Ленінскае (на захадзе ад гораду Горлаўка). Імаверна, актыўнасць ЗСУ на гэтым участку разлічаная на расцягванне сілаў расейцаў.
На аўдзееўскім кірунку, пасля захопу расейцамі аднайменнага гораду, назіраецца зніжэнне інтэнсіўнасці баявых дзеянняў.
Украінскі бок паведамляе пра пяць пяць няўдалых атак войскаў РФ каля сёлаў Новабахмутаўка, Ластачкіна і Первамайскае.
Самыя ЗСУ прынамсі дзевяць разоў атакавалі каля Ластачкіна і Первамайскае, што ўказвае на спробы стабілізаваць лінію сутыкнення.
Аналітыкі Deepstate пішуць, што ў сяле Ластачкіна УС РФ так і не здолелі замацавацца, хоць і мелі істотную перавагу ў жывой сіле. Адзначаецца, што цяпер яны назапашваюць новыя сілы, каб аднавіць штурм у бліжэйшыя дні.
На мар’інскім кірунку Узброеныя сілы РФ наступаюць у ваколіцах населеных пунктаў Георгіеўка, Пабеда і Новаміхайлаўка – цягам содняў яны не менш за 18 разоў атакавалі на гэтых участках фронту. Зменаў лініі фронту не зафіксавана.
На паўднёвым захадзе Данецкай вобласці, па словах аналітыкаў Deepstate, расейскія вайскоўцы актывізаваліся каля сяла Новаданецкае – тут працягваюцца баі. Пакуль сілам абароны Украіны ўдаецца стрымліваць праціўніка.
Больш маштабныя наступальныя дзеянні расейскія вайскоўцы праводзяць у суседняй Запарожскай вобласці, дзе яны атакуюць на выступе па фронце з поўдня ад гораду Арэхаў.
Прарасейскі тэлеграм-канал «Архангел Спецназа» піша, што тут УС РФ зайшлі ў сяло Работына з поўдня і захаду, а таксама прасунуліся на ўчастку паміж Работына і суседнім Вэрбовым.
Пры гэтым адзначаецца, што ЗСУ ўсімі сіламі намагаюцца не пусціць праціўніка ва ўсходнюю частку Работына.
Іншая прарасейская крыніца – «Рыбарь» – паведамляе, што баі ідуць у цэнтры сяла.
Між тым прарасейскія каналы пішуць, што расейцы не змаглі прарвацца ў Работына, пры гэтым самыя панеслі істотныя страты ў жывой сіле і тэхніцы.
У Херсонскай вобласці баявыя дзеянні лакалізуюцца на левым беразе Дняпра, дзе ЗСУ ўтрымліваюць некалькі невялікіх плацдармаў. За апошнія содні вядома пра не менш за 16 безвыніковых штурмаў пазіцыяў сілаў абароны з боку праціўніка. Пра змены не паведамляецца.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
