Грошы збіраюць ужо на два канцэрты: офлайнавы ў Варшаве і онлайнавы ад каманды БНР-100.
Аб’яднаны пераходны кабінет і партнёры адкрылі збор грошай на арганізацыю канцэрту да Дня Волі ў Варшаве – асобную імпрэзу ад канцэрту, які задумалі арганізатары БНР-106 для гледачоў з Беларусі. На варшаўскім канцэрце 24 сакавіка маюць граць Піт Паўлаў, Atesta і Dzieciuki.
Варшаўскі канцэрт арганізуюць Аб’яднаны пераходны кабінет, Беларуская асацыяцыя палітвязняў «Да волі», суполка «Беларусы Варшавы», Беларускі моладзевы хаб і Музей Вольнай Беларусі.
Імпрэзу збіраюцца правесці 24 сакавіка. Спачатку будзе мітынг з удзелам беларускіх, польскіх і ўкраінскіх палітычных грамадскіх дзеячаў, пачатак а 14:00 на пляцы Трох крыжоў (plac Trzech Krzyży). Затым пройдзе марш да помніка Мікалаю Каперніку (Pomnik Mikołaja Kopernika), дзе беларусы Варшавы праводзяць штотыднёвыя акцыі. А фінальнай часткай будзе канцэрт на Замкавым пляцы (plac Zamkowy) перад Каралеўскім замкам. Выступіць маюць Піт Паўлаў, гурты Atesta, Dzieciuki і іншыя.
На імпрэзе плануюць сабраць каля чатырох тысяч чалавек. Для арганізацыі канцэрту хочуць сабраць ахвяраванні на суму 4,5 тысячы еўраў: 3000 на мантаж сцэны, 1100 – на ганарары музыкам, 400 – на друк банераў і ўлётак, а таксама іншыя арганізацыйныя моманты. Ахвяраваць сумы ад € 5 можна тут.
Паўлаў, дарэчы, зайграе 24 сакавіка яшчэ адзін канцэрт – «Дзень Волі на Woli», ужо разам з гуртом N.R.M. у варшаўскім раёне Воля.
Прадстаўніца Аб’яднанага пераходнага кабінету ў нацыянальным адраджэнні Аліна Коўшык расказала «Белсату», што 25 сакавіка ў Варшаве таксама пройдуць адкрытыя і закрытыя імпрэзы да Дня Волі, у тым ліку імпрэза для замежных дыпламатаў.
Важныя падзеі для святкавання Дня Волі адбудуцца і ў Празе, сталіцы Чэхіі. Там, расказала Коўшык, будзе адбывацца Канферэнцыя беларусаў свету, а таксама адкрыецца пражскі офіс дэмакратычных сілаў.
,,«Я думаю, што ў Новай Беларусі гэты дзень абавязкова будзе выходным, будзе святкавацца на належным узроўні, бо гэта сапраўдны дзень беларускай незалежнасці», – дадала Коўшык пра Дзень Волі.
Коўшык згадала, як святкавала Дзень Волі яшчэ са школьных гадоў. Але рэжым Аляксандра Лукашэнкі, адзначыла яна, вынес урок са святкавання 100-годдзя Беларускай Народнай Рэспублікі, калі ўсе пабачылі, што гэта сапраўды народнае свята. Цяпер рэжым змагаецца не толькі з Днём Волі, але з усім, што нагадвае пра незалежнасць і магутнасць Беларусі, пра ідэнтычнасць беларусаў. Паводле яе, рэжым праводзіць цяпер палітыку татальнай русіфікацыі і каланізацыі Беларусаў, «зачысткі» беларускай культуры і мовы. У Беларусі проста не дазволяць публічна адсвяткаваць Дзень Волі і іншыя беларускія святы.
Да Дня Волі ладзіцца і канцэрт ад каманды БНР-100, на які таксама збіраюць грошы.
Як растлумачыў «Белсату» прадстаўнік каманды Антон Матолька, канцэрт БНР-106 разлічаны найперш на онлайн-трансляцыю для беларусаў у Беларусі, колькасць месцаў для гледачоў на ім будзе абмежаваная. Тым часам Кабінет плануе зладзіць канцэрт у Варшаве для вялікай колькасці наведнікаў – гэта іншы фармат.
Матолька дадаў, што каманда БНР-100 падтрымлівае канцэрт у Варшаве і імпрэзы ў іншых гарадах і заклікае спрыяць любой такой актыўнасці на Дзень Волі.
Аліна Коўшык пацвердзіла: Кабінет трымае кантакт з арганізатарамі БНР-106. Але імпрэзы «не перасякаюцца»: БНР-106 арыентаваны перадусім на онлайн, варшаўскі канцэрт – перадусім на жывую прысутнасць.
Алесь Наваборскі belsat.eu
