Сярод паліцыі ёсць параненыя, сярод пратэстоўцаў – затрыманыя.
6 сакавіка ў Варшаве праходзіць чарговая акцыя польскіх аграрыяў. Сёння да іх далучыліся шахтары, леснікі і паляўнічыя. Аб гэтым паведамляе выданне «Rzeczpospolita».
Прычынай для пратэстаў стала рашэнне Еўрапейскай камісіі аб працягу бяспошліннага гандлю з Украінай да 2025 года, а таксама так званая палітыка «Зялёнага курсу», якая робіць больш жорсткімі патрабаванні ў галіне сельскай гаспадаркі.
Пратэст пачаўся аб 11-й гадзіне па польскім часе каля Канцылярыі прэм’ер-міністра краіны. Паколькі ўлады забаранілі праезд трактароў у Варшаву, то фермеры пакінулі іх па-за межамі гораду. Да канцылярыі пратэстоўцы прыгналі вялікі трактар з надпісам «Аграабрамс».
На месцы збору пачалі падрываць петарды, паліць шыны, таксама тут падпалілі сімвалічную труну з надпісам «Фермер. Жыў 20 гадоў. Яго забіў зялёны пераход». Абгарэлыя дошкі пратэстоўцы кінулі ў паліцыю – пасля чаго тая адціснула пратэстоўцаў далей ад канцылярыі, але, паводле карэспандэнтаў «Rzeczpospolita», не праводзіла затрыманняў.
Пазней калона з пратэстоўцамі рушыла ў бок польскага Сейму. Тут пачаліся сутычкі з паліцыяй: пратэстоўцы кідалі ім пад ногі петарды. Паліцыя стала прымяняць пярцовы газ і адцясняць пратэстоўцаў.
У выніку сутычак было паранена некалькі паліцыянтаў, таксама паведамляецца пра некалькі дзясяткаў затрыманых пратэстоўцаў.
У паліцыі Варшавы падкрэслілі, што ўсе інцыдэнты рэгіструюцца і будуць прааналізаваныя. У выпадку парушэння закону, да парушальнікаў будуць прынятыя адпаведныя меры.
Раман Шавель belsat.eu
