Агляд рэпрэсіяў рэжыму Лукашэнкі супраць беларусаў.
Сілавікі працягваюць затрымліваць беларусаў за пратэсты 2020 года і данаты. Не менш за 129 чалавек судзілі па крымінальных справах у лютым.
Пастар евангельскай царквы з Новалукомля Аляксандр Зарэцкі зноў асуджаны на 15 сутак адміністрацыйнага арышту. На гэты раз «крамолу» знайшлі ў яго казанні падчас набажэнства. Судзілі Зарэцкага па артыкуле «Парушэнне парадку арганізацыі і правядзення масавых мерапрыемстваў», паведамляе «Хрысціянская візія».
Затрыманне пастара адбылося ў Чашніцкім раёне Віцебскай вобласці 22 лютага. За малітву за спыненне вайны ва Украіне, якая гучала ў яго абшчыне падчас набажэнстваў, Аляксандра Зарэцкага арыштавалі на 15 сутак. А днямі быў асуджаны паўторна.
Адзначаецца, што раней мясцовыя ідэолагі неаднаразова выказвалі прэтэнзіі пастару за згаданыя малітвы і пагражалі пераследам. Мясцовых чыноўнікаў не задавальняла і тое, што Зарэцкі адмаўляўся ўдзельнічаць у палітычных мерапрыемствах. Вясной 2023-га пастар правёў за кратамі месяц. Яго двойчы асудзілі на 15 сутак адміністрацыйнага арышту за «распаўсюд экстрэмісцкай прадукцыі».
ГУБАЗіК затрымаў менскага прадпрымальніка за тое, што ён заданаціў 10 долараў Nexta праз сістэму PayPal. Відэа з ім з’явілася ў праўладным тг-канале. Мужчына займаецца рознічным гандлем запчастак, якія былі ў выкарыстанні. У відэароліку ён паказвае тры кубкі з гербам «Пагоня» і кажа, што піў з іх на дваровых чаяваннях. Затрыманы паабяцаў разбіць гэтыя кубкі пасля вызвалення.
Жыхара Пружанаў асудзілі за тое, што ў раённай больніцы «ганьбіў» Лукашэнку. У судзе Пружанскага раёну ў лютым разглядалася справа мясцовага жыхара Васіля Ячычкі. Як піша раённая газета, у сярэдзіне лістапада мінулага года 45-гадовы мужчына «у прысутнасці работнікаў медычнай установы, прадстаўнікоў райвыканкаму і наведвальнікаў пачаў у голас ганьбіць дзеючую ўладу, кіраўніка краіны». Сцвярджаецца, што ён вырашыў «памітынгаваць» у будынку раённай больніцы ў нецвярозым стане. Была распачатая крымінальная справа.
За «абразу Лукашэнкі» Ячычка асуджаны на два гады абмежавання волі з накіраваннем у папраўчую ўстанову адкрытага тыпу («хіміі»). Рашэнне вынес суддзя Ігар Жытко.
У Берасці за ўдзел у пратэстах 2020 года затрымалі жыхара гораду. Яго «пакаяльнае» відэа апублікаваў 7 сакавіка набліжаны да ГУБАЗіК тэлеграм-канал. Прапагандысты паказалі, як выламалі ўваходныя дзверы ў кватэру хлопца, а затым паклалі яго тварам у падлогу і надзелі кайданкі.
Брэстаўчаніна прымусілі на камеру прызнацца ва ўдзеле ў «палітычным мітынгу» у 2020 годзе, а таксама вымусілі павіншаваць ГУБАЗіК з гадавінай з дня ўтварэння і прапанаваць падпісацца на іх тэлеграм-канал.
Сілавікі затрымалі ў Віцебску блогера і музыканта, які выступае пад творчым псеўданімам Леха Павук. Яго «пакаяльнае» відэа апублікаваў набліжаны да ГУБАЗіК тэлеграм-канал.
На камеру мужчыну прымусілі расказаць пра тое, што яго затрымалі за распаўсюд «экстрэмісцкіх» матэрыялаў. Сілавікі таксама вымусілі яго пад запіс праспяваць гімн. Прапагандысты ўдакладнілі, што затрыманага адправілі ў ізалятар часовага ўтрымання.
Мужа і жонку затрымалі, калі яны выязджалі з Беларусі ў госці да дзяцей. За ўдзел у адным з маршаў 2020-га ў Менску Мікалаю і Іне Шляжко прысудзілі па два з паловай гады «хатняй хіміі». Справу разглядаў суд Савецкага раёну сталіцы, суддзя – Вольга Емельянчанка. Мікалай і Іна Шляжко прызналі віну. Мужчына пацвердзіў, што яны выходзілі на праезную частку дарогі. Доказам па справе былі фотаздымкі ў тэлефоне, на якіх муж і жонка знаходзіліся на праезнай частцы падчас вулічнай акцыі. Іх вызвалілі ў зале суда (з часу затрымання яны былі пад вартай).
Пʼяны жыхар Смаргоні сарваў беларускі дзяржаўны сцяг з будынку крамы. 35-гадовы мужчына адарваў палотнішча ад мацавання і паклаў яго ў кішэню курткі. Гэтага дзеяння хапіла для таго, каб завесці крымінальную справу за «здзек з дзяржаўнай сімволікі» і адправіць мужчыну ў СІЗА. Пракуратура адзначае, што раней жыхар Смаргоні не быў фігурантам крымінальных спраў. Цяпер яму пагражае да 3 гадоў калоніі.
МУС абнавіла спіс асоб, якія маюць дачыненне да «экстрэмісцкай дзейнасці», і дадало туды 19 чалавек. У абноўлены спіс у тым ліку ўключаны былыя сілавікі Аляксандр Азараў, Андрэй Астаповіч, Алег Талерчык, Уладзімір Жыгар Мацвей Купрэйчык, Ігар Лобан. Усяго ў спісе 3864 чалавекі.
Не менш за 129 чалавек судзілі па крымінальных справах у лютым у Беларусі, з якіх 46 складаюць жанчыны, 83 – мужчыны. Лідарамі па палітычных судах называюцца Менск, Берасцейская і Гарадзенская вобласці.
Працягваецца масавы пераслед за ўдзел у акцыях пратэсту ў 2020 годзе. У 73 чалавек са 129 у абвінавачанні быў або адзін артыкул 342 КК («Актыўны ўдзел у групавых дзеяннях, якія груба парушаюць грамадскі парадак»), або ён быў у абвінавачанні разам з іншымі артыкуламі. На момант публікацыі матэрыялу ўдалося пацвердзіць 13 прысудаў.
Статыстыка крымінальнага пераследу ў мінулым месяцы выглядае наступным чынам:
Ася Саковіч belsat.eu
