Яму не спадабалася канцэпцыя перамоваў з Расеяй, якую прапанаваў Папа Рымскі.
Кіраўнік МЗС Украіны Дмытро Кулэба дыпламатычна раскрытыкаваў словы Папы Рымскага Францішка пра тое, што Украіна павінна мець мужнасць падняць белы сцяг і пайсці на перамовы з Расеяй. Кулэба заклікаў Папу Рымскага прыехаць ва Украіну і падтрымаць усіх украінскіх каталікоў і хрысціянаў.
«Мацней за ўсё той, хто ў бітве дабра са злом становіцца на бок дабра, а не спрабуе параўнаць іх, назваўшы гэта “перамовамі”», – піша ў «Х» Дмытро Кулэба. – «Што тычыцца белага сцяга, то па гісторыі першай паловы ХХ стагоддзя нам вядомая гэтая стратэгія Ватыкана.
,,Заклікаю не паўтараць гістарычныя памылкі і паслядоўна падтрымліваць Украіну і яе народ у справядлівай барацьбе за ўласнае жыццё. Наш сцяг – сіне-жоўты. Пад ім мы жывем, паміраем і перамагаем. Мы не будзем падымаць іншыя сцягі.
Мы ўдзячныя Яго Святасці Папе Францішку за пастаянныя малітвы за мір і працягваем спадзявацца, што пасля двух гадоў сакрушальнай вайны ў сэрцы Еўропы ён знойдзе магчымасць здзейсніць Апостальскі візіт ва Украіну, каб падтрымаць больш за мільён украінцаў-каталікоў, больш за пяць мільёнаў грэка-каталікоў, усіх хрысціянаў і ўсіх украінцаў».
Папа Рымскі Францыск заявіў у інтэрв’ю, што Украіна павінна мець мужнасць «белага сцяга» і весці перамовы аб спыненні вайны з Расеяй. Запіс яго інтэрвʼю швейцарскай тэлекампаніі RSI быў у мінулым месяцы.
«Я думаю, што мацней за ўсіх той, хто глядзіць на сітуацыю, думае пра людзей, мае мужнасць белага сцяга і вядзе перамовы», – сказаў Францішак.
На яго думку, перамовы павінны праходзіць з дапамогай міжнародных дзяржаў.
,,«Слова “перамовы” – гэта мужнае слова. Калі вы бачыце, што церпіце паразу, што справы ідуць не вельмі добра, вы павінны мець мужнасць весці перамовы», – дадаў Папа Рымскі.
Прэзідэнт Турцыі Таіп Эрдаган прапанаваў 8 сакавіка правесці саміт паміж Украінай і Расеяй, каб пакласці канец вайне. Прапанова была агучаная падчас сустрэчы з прэзідэнтам Украіны Уладзімірам Зяленскім. Зяленскі адказаў, што хоча міру, ён не мае намеру саступаць украінскую тэрыторыю.
Арсен Рудэнка belsat.eu
