У выніку перамяшчэння тэхнікі могуць быць праблемы з транспартам.
У Беларусі пачалося правяранне баявой гатовасці злучэнняў і вайсковых частак Узброеных сілаў. Можа быць абмежаваны рух цывільнага транспарту. Пра гэта паведаміла прэс-служба Міністэрства абароны.
«Правяранне носіць комплексны характар. Асабоваму складу трэба будзе высунуцца ў прызначаныя раёны, правесці шэраг вучэнняў і трэнаванняў, у тым ліку з баявой стральбой», – адзначае Міністэрства абароны.
Сярод іншага ў хадзе правярання плануецца перамяшчэнне вайсковай тэхнікі, таму магчымае часовае абмежаванне руху цывільнага транспарту па дарогах агульнага карыстання і ўчастках мясцовасці.
На фоне вучэнняў прапагандысцкія тэлеграм-каналы пужаюць беларусаў і папярэджваюць, каб не здымалі вайсковай тэхнікі. А таксама заахвочваюць вайскоўцаў рабіць фота і відэа тых, хто будзе здымаць іх. У Беларусі былі выпадкі завядзення крымінальных справаў за фота і відэа вайскоўцаў. Асабліва шмат такіх выпадкаў было на пачатку поўнамаштабнага расейскага ўварвання ва Украіну.
Вайсковае камандаванне рэгулярна выхваляецца поспехамі вучэнняў. Да цяперашніх мерапрыемстваў, у канцы студзеня, ва Узброеных сілах пачалося правяранне баявой гатовасці вайсковых частак і падраздзяленняў.
Арсен Рудэнка belsat.eu
