Сярод пацярпелых ёсць ратавальнікі і медыкі.
Расейская армія 15 сакавіка нанесла падвойны ракетны ўдар па цывільнай інфраструктуры Адэсы.
Кіраўнік Адэскай абласной вайсковай адміністрацыі Алег Кіпэр паведаміў, што ўсяго ў выніку расейскай атакі загінулі 14 чалавек, 46 атрымалі раненні. Пазней стала вядома, што лік ахвяраў вырас: па стане на 17:00 было ўжо 16 забітых і 55 параненых.
Увечары 15 сакавіка генеральны пракурор Андрэй Косцін заявіў, што колькасць загінулых павялічылася да 19 чалавек, а 73 атрымалі раненні. Яшчэ праз гадзіну Дзяржаўная служба па надзвычайных сітуацыях (ДСНС) паведаміла, што лік загінулых дасягнуў ужо 20 чалавек.
Сярод пацярпелых ёсць ратавальнікі і медыкі. Гэта звязана з тым, што расейцы двойчы білі ў адно месца. Першы ўдар пашкодзіў цывільную інфраструктуру, пачаўся пажар. На месца прыбылі ратавальнікі. У гэтым момант расейцы атакавалі паўторна. У выніку адзін супрацоўнік ДСНС загінуў, сямёра параненыя. Таксама загінуў адзін медык.
Паводле ДСНС, агулам былі пашкоджаны 10 прыватных будынкаў, станцыя тэхнічнага абслугоўвання, газаправод і два пажарныя аўтамабілі.
Адэская пракуратура распачала крымінальную справу паводле артыкулу «Парушэнне законаў і звычаяў вайны».
«Расейскі тэрор Адэсы – гэта прыкмета слабасці ворага, які ваюе з цывільнымі ўкраінцамі ў той час, калі не можа гарантаваць бяспекі людзям на ўласнай тэрыторыі», – пракаментаваў трагедыю ў Адэсе кіраўнік Офісу прэзідэнта Украіны Андрэй Ермак.
16 сакавіка ў Адэсе абвешчаны днём жалобы.
Глеб Нержын belsat.eu
