Вайна ва Украіне. Падсумоўваем асноўныя падзеі на вечар 16 сакавіка.
«Белсат» падводзіць вынікі 752-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 16 сакавіка чытайце ў нашым аглядзе.
У Міністэрстве абароны РФ заявілі пра працяг баявых дзеянняў на ўкраінска-расейскім памежжы: некалькі дыверсійна-выведных групаў намагаліся прарвацца на тэрыторыю Белгародскай вобласці ў ваколіцах сёлаў Спадарушына і Казінка, але былі загадзя выяўленыя і спыненыя УС РФ.
Тэлеграм-канал «Два майора» піша, што праўкраінскія сілы зноў намагаюцца прарвацца цераз мяжу.
На купянскім кірунку, паводле ўкраінскага і расейскага камандаванняў, ідуць сустрэчныя баі ў ваколіцах сяла Сынькоўка, але лінія сутыкнення застаецца нязменнай.
Таксама цягам апошніх содняў у Харкаўскай вобласці войскі РФ атакавалі каля Табаеўкі, але поспеху не мелі.
На суседнім ліманскім кірунку атакі войскаў РФ фіксуюцца каля Цернаў і Раздолаўкі на поўначы Данецкай вобласці, а таксама ў ваколіцах Белагораўкі на Луганшчыне.
Праўкраінскія крыніцы пішуць, што цяпер праціўнік назапашвае рэзервы, каб аднавіць больш актыўныя наступальныя аперацыі.
На бахмуцкім кірунку баявыя дзеянні ідуць на захадзе і поўдні ад аднайменнага раённага цэнтру.
Генштаб ЗСУ паведамляе пра тры адбітыя атакі праціўніка каля населеных пунктаў Клішчыеўка і Андрэеўка.
Расейскі ваенкор Сямён Пегаў гаворыць, што таксама войскі РФ штурмуюць пазіцыі ўкраінцаў у ваколіцах Багданаўкі і Іванаўскага.
Праўкраінскі тэлеграм-канал «Говорять Снайпер» удакладняе, што ў Іванаўскім расейцы беспаспяхова намагаюцца выбіць ЗСУ з заходняй часткі сяла, пры гэтым нясуць істотныя страты ў жывой сіле і тэхніцы.
На аўдзееўскім кірунку працягваюцца баі з захаду ад аднайменнага гораду. Паводле Генштабу ЗСУ, цягам апошніх содняў сілы абароны краіны адбілі не менш за 26 атак праціўніка каля населеных пунктаў Бэрдычы, Арлоўка, Танэнькае і Первамайскае.
Між тым аналітыкі праекту Deepstate пішуць, што расейцы прасунуліся ў Танэнькім і з поўначы ад Арлоўкі.
Прарасейскі тэлеграм-канал «Рыбарь» сцвярджае, што на захадзе ад Танэнькага УС РФ занялі разваліны малочна-таварнай фермы. Таксама расейцы прарваліся з боку Бэрдычаў да ўскрайкаў сяла Сямёнаўка, але не здолелі замацавацца.
Па інфармацыі крыніцы, баі на кірунку пераходзяць у пазіцыйны характар. Пры гэтым агулам расейцам не ўдаецца рухацца далей на захад, што ў першую чаргу звязваецца з перавагай ЗСУ ў колькасці асабовага складу і FPV-дронаў.
У гэты ж час Пегаў гаворыць, што войскі РФ валодаюць ініцыятывай, таму ўкраінцы вымушаныя паступова адцягваць свае сілы да Сямёнаўкі.
На навапаўлаўскім кірунку, паводле ўкраінскага камандавання, ЗСУ адбілі 24 атакі праціўніка каля населеных пунктаў Краснагораўка, Георгіеўка і Новаміхайлаўка.
Пегаў сцвярджае, што ў ваколіцах Краснагораўкі і Новаміхайлаўкі расейцы ўсё ж дасягнулі тактычных поспехаў.
У сваю чаргу вайскоўцы 46-й брыгады ЗСУ адмаўляюць змены па лініі сутыкнення, адзначаючы, што войскі РФ узялі паўзу, і цяпер дзейнічаюць выключна невялікімі штурмавалі групамі, а таксама наносяць удары авіяцыяй і артылерыяй.
У сваю чаргу Збройныя сілы Украіны атакавалі каля сяла Уладзіміраўка (на паўднёвым усходзе ад гораду Вуглядар), але поспеху не дасягнулі.
На ўсходзе кірунку ідуць баі ў ваколіцах так званага ўрэмеўскага выступу (на мяжы Данецкай і Запарожскай вобласцяў). Украінскі бок піша пра няўдалыя атакі праціўніка каля сяла Старамаёрскае. У гэты ж час Міністэрства абароны РФ сцвярджае, што іхныя вайскоўцы палепшылі становішча па пярэднім краі ў ваколіцах сёлаў Ураджайнае і Рыўнопаль.
У цэнтральнай частцы Запарожскай вобласці баявыя дзеянні лакалізуюцца на выступе па фронце з поўдня ад гораду Арэхаў.
Пегаў піша пра сустрэчныя баі ў сяле Работына і каля Вэрбовага, але пры гэтым ваенкор адзначае ініцыятыву УС РФ.
Тэлеграм-канал «Два майора» сцвярджае, што цяпер расейцы кантралююць поўдзень і цэнтр Работына.
У Херсонскай вобласці працягваюцца баі на левым беразе Дняпра, дзе ЗСУ ўтрымліваюць некалькі невялікіх плацдармаў. Генштаб ЗСУ піша пра тры няўдалыя спробы праціўніка выбіць сілы абароны краіны з займаных пазіцыяў.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
