БелАЗ пракрэдытуюць пад мэтавыя закупкі камплектацыі ў Расеі.
ВЭБ.РФ і Банк БелВЭБ пачалі фінансаванне паставак высокатэхналагічнай прадукцыі расейскай вытворчасці для БелАЗа. Пра гэта паведамляецца на сайце Банку БелВЭБ.
Для прадпрыемства адкрыта аднаўляльная крэдытная лінія тэрмінам 3 гады да 3 млрд расейскіх рублёў. Сродкі даюцца траншамі на тэрмін да 1 года. Сумарны аб’ём сродкаў, які фінансавыя інстытуты патэнцыйна могуць выдзеліць БелАЗу за ўвесь тэрмін дзеяння крэдытнай лініі, складае 9 млрд расейскіх рублёў. Праектам прадугледжана выкарыстанне механізму субсідзіравання працэнтнай стаўкі ў адпаведнасці з пастановай урада РФ.
Першыя 2,7 млрд расейскіх рублёў група ВЭБ.РФ ужо прадаставіла БелАЗу.
Крэдытныя рэсурсы накіроўваюцца на закупку запасных частак расейскай вытворчасці для арганізацыі выпуску карʼерных самазвалаў.
Гэта прадукцыя ўключана ў пералік высокатэхналагічнай прадукцыі, работ і паслуг з улікам прыярытэтных напрамкаў мадэрнізацыі расейскай эканомікі, зацверджаны загадам міністэрства прамысловасці і гандлю Расейскай Федэрацыі.
Адзначаецца, што толькі за апошнія 6 гадоў Банк БелВЭБ прафінансаваў бягучую дзейнасць БелАЗа ў абʼёме 2,9 млрд расейскіх рублёў.
На БелАЗе працуе звыш 10 тысяч чалавек, гэта асноўнае прадпрыемства Жодзіна. Пасля жнівеньскіх пратэстаў 2020 году кіраўніцтва БелАЗу абвінавачвалі ў рэпрэсіях супраць супрацоўнікаў, якія далучыліся да пратэстаў і адкрыта выказвалі сваю нязгоду з падзеямі ў краіне. У прыватнасці, з’яўляліся паведамленні аб тым, што кіраўніцтва прадпрыемства ўтрымлівае рабочых у памяшканнях цэхаў, не дазваляючы людзям збірацца разам на тэрыторыі заводу.
Ася Саковіч belsat.eu
