У Дзярждэпартаменце заявілі, што Масква не дае доказаў.
Кіраўнік ФСБ Аляксандр Бортнікаў абвінаваціў ЗША, Вялікую Брытанію і Украіну ў датычнасці да нападу на «Crocus City Hall» у Падмаскоўі. У Дзяржаўным дэпартаменце адказалі: «Гэта няпраўда».
«Мы выразна заявілі: няма аніякіх доказаў таго, што Украіна была ўцягнутая ў гэта, бо Украіна і не была ўцягнутая. Усе каментары расейскіх афіцыйных асобаў, у тым ліку прэзідэнта Пуціна, – проста прапаганда, каб апраўдаць іхную агрэсію, што трывае, супраць Украіны», – заявіў журналістам прэс-сакратар Дзяржаўнага дэпартаменту ЗША Мэт’ю Мілер.
Гэтак Мілер адказаў на просьбу пракаментаваць абвінавачванні ў тым, што за атакаю нібыта стаяць ЗША, Вялікая Брытанія і Украіна.
Адказнасць за тэракт у Падмаскоўі ўзяла на сябе «Даіш». Амерыканцы думаюць, што менавіта гэтая групоўка ўчыніла напад.
26 сакавіка кіраўнік ФСБ Аляксандр Бортнікаў заявіў, што выканаўцамі былі радыкалы-ісламісты, і замлўцы яшчэ не выявілі, аднак датычных ён ужо вызначыў: ЗША, Вялікая Брытанія і Украіна.
Версія пра нібыта ўкраінскі след з’явілася ў медыях на наступны дзень пасля тэракту. Уладзімір Пуцін заявіў, што ў нападнікаў «былі адпаведныя кантакты» ў суседняй краіне, і для іх на расейска-ўкраінскай мяжы падрыхтавалі «вакно».
Аляксандр Лукашэнка 26 сакавіка зняпраўдзіў версію Крамля пра тое, што тэрарысты першапачаткова хацелі схавацца ва Украіне. Паводле палітыка, яны ехалі ў бок нашай краіны, аднак «у Беларусь аніяк не маглі зайсці, яны гэта бачылі, таму адвярнуліся і пайшлі на адцінак украінска-расейскай мяжы».
Кіеў абвінавачванні ў датычнасці да тэракту адкідвае.
Сцяпан Кубік belsat.eu
