Магнітуда склала 7,4. У суседніх краінах абвяшчалі небяспеку цунамі.
Ля ўсходняга ўзбярэжжа Тайваню адбыўся землятрус магнітудай 7,4. На востраве і ў суседніх краінах папярэджвалі наконт цунамі. Сейсмолагі кажуць, што гэта самы магутны землятрус на Тайвані за апошнія 25 гадоў.
Эпіцэнтр, паводле звестак Геалагічнай службы ЗША, быў за 18 кіламетраў на поўдзень ад тайванскага гораду Хўа-Лень, на глыбіні 15,5 кіламетраў. Землятрус здарыўся а 07:58 раніцы паводле мясцовага часу (23:58 паводле Грынвічу). Пасля былі сама меней дзевяць паўторных штуршкоў магнітудай ад 4 і вышэй.
У горадзе Хўа-Лень шмат будынкаў абвалілася, там працуюць ратавальнікі. Дамы моцна трэсліся і ў сталіцы Тайваню Тайбэі.
Пакуль вядома пра гібель адной асобы ў нацыянальным парку недалёка ад Хўа-Лень, паведаміла тайванскае Нацыянальнае пажарнае агенцтва. Яшчэ трое асобаў там жа былі параненыя, многіх заблакавала ў пячорах.
Абноўлена. Загінулі прынамсі 9 чалавек, параненыя звыш 900, зніклі не менш за 50.
Па ўсім востраве фіксуюцца адлучэнні электрычнасці і збоі інтэрнэту.
У Японіі і на Філіпінах неўзабаве пасля землятрусу было абвешчана папярэджанне наконт цунамі. Японскае Метэаралагічнае агенцтва пазней знізіла ўзровень небяспекі, аднак адзначыла, што паўторныя штуршкі пасля землятрусу такой магутнасці могуць працягвацца яшчэ да тыдня, і насельніцтву варта захоўваць пільнасць.
Ціхаакіянскі цэнтр папярэджання пра цунамі праз дзве гадзіны пасля землятрусу абвесціў, што пагроза ўжо прайшла.
Кітайскія дзяржаўныя СМІ паведамілі, што падземныя штуршкі таксама адчуваліся ў мацерыковай правінцыі Фуцзянь на паўднёвым усходзе краіны.
,,«Землятрус пачаўся блізка да сушы, на малой глыбіні. Ён адчуваўся па ўсім Тайвані і на суседніх астравах. Ён наймацнейшы за апошнія дваццаць пяць гадоў», – заявіў кіраўнік Тайбэйскага цэнтру сейсмалогіі Ўу Чэнь Фу.
У глыбіні востраву рэльеф вельмі гарысты. Мяркуючы з кадраў у сацыяльных сетках, землятрус выклікаў там вялізныя апоўзні. Аднак маштаб наступстваў пакуль не вядомы.
У верасні 1999 года Тайвань перанёс землятрус магнітудай 7,6, які разбурыў больш за 5 тысяч будынкаў і забраў жыцці 2400 асобаў.
Марыя Міхалевіч belsat.eu
