На экспазіцыі прадстаўленыя рэчы, якімі карысталіся ў калоніі жанчыны.
У сталіцы Нямеччыны запрацавала выстава, прысвечаная ўмовам, у якіх знаходзяцца зняволеныя з палітычных матываў беларускі. Пра гэта паведамляе тэлеграм-канал «Доўгая Дарога Дадому».
На экспазіцыі прадстаўленыя рэчы, якімі карысталіся ў калоніі палітвязынкі: зношаная сукенка, хустка, целагрэйка, спадніца, пінжак. Ёсць тут і рукавіцы, якія сагравалі рукі, пакуль палітзняволеная чысціла снег. Майка з вышытымі на ёй абдымкамі і далонькамі сяброў, якую даслалі ў СІЗА да дня нараджэння зняволенай.
Адна палітычная зняволеная перадала сваю белую сукенку, у ёй брала шлюб у касцёле, а потым у ёй пайшла на суд. Ёй вынеслі абвінаваўчы прысуд.
На экспазіцыі ёсць асабісты дзённік і фотаздымкі, якія жанчыны атрымлівалі ў турмах, а таксама паштоўкі ад маленькага сына зняволенай, абутак са шнуркамі з пакетаў.
Выставу можна наведаць па адрасе: Friedrichstraße 43-45, 10969 Berlin, Нямеччына.
Якуб Хруст belsat.eu
