Спатканне адбылося са згоды Лукашэнкі.
Кіраўніца Саюзу палякаў Беларусі Анджэліка Борыс паведаміла пра спатканне з палітвязнем Анджэем Пачобутам у наваполацкай калоніі. Яна апавяла пра гэта прэзідэнту Польшчы Анджэю Дуду на сустрэчы ў Варшаве 15 красавіка, інфармуе канцылярыя польскага лідара.
Кіраўнік Польшчы Анджэй Дуда сустрэўся ў прэзідэнцкім палацы з лідарамі Саюзу палякаў Беларусі – Анджэлікай Борыс і Марэкам Занеўскім.
,,«Спадарыня Борыс паведаміла пра спатканне з Анджэем Пачобутам, які ў зняволенні ў наваполацкай калоніі, сустрэча адбылася са згоды Аляксандра Лукашэнкі», – інфармуюць у канцылярыі польскага прэзідэнта.
Калі адбылася сустрэча Борыс з Пачобутам, не ўдакладняецца. Таксама невядомыя акалічнасці гэтага спаткання.
Анджэліку Борыс і Анджэя Пачобута затрымалі 25 сакавіка 2021 года. Летась у красавіку Борыс вызвалілі, закрыўшы справу супраць яе. Актывістку абвінавачвалі ў «распальванні варожасці», і за два гады следства не знайшло прыкметаў злачынства.
Журналіст, сябра Саюзу палякаў Беларусі Анджэй Пачобут адбывае 8-гадовы тэрмін паводле абвінавачвання ў «распальванні варожасці» і «закліках да санкцыяў». Такі вырак агучыў суддзя Гарадзенскага абласнога суда Дзмітрый Бубенчык. Пазней суддзя Вярхоўнага Суда Ігар Любавіцкі адхіліў апеляцыйную скаргу палітвязня.
За кратамі Пачобута кідаюць то ў штрафны ізалятар, то ў памяшканне камернага тыпу.
Сёння палітвязню споўніўся 51 год.
Сцяпан Кубік belsat.eu
