Прапаганда спрабуе звязаць гэта ўсё з пратэстамі і апазіцыяй.
ГУБАЗіК затрымаў жыхара Баранавічаў і знайшоў у яго арсенал зброі. Затрыманы кажа, што займаўся калекцыянаваннем. Прапаганда спрабуе звязаць яго з пратэстамі і апазіцыяй. Адпаведны сюжэт паказалі ўвечары ў нядзелю, 21 красавіка, на ОНТ.
Завуць затрыманага Аляксей Лопух, нарадзіўся ў 1996 годзе і жыве ў Баранавіцкім раёне. Затрымлівалі мужчыну супрацоўнікі аддзелу крымінальнага вышуку разам з супрацоўнікамі ГУБАЗіКу пры сілавым падтрыманні спецпадраздзялення «Алмаз».
Пры правяранні кватэры знайшлі «цэлы арсенал» зброі: пісталеты, аўтаматы, гранаты, тактычныя ўборы, рацыі, нажы – усяго больш за 30 адзінак. Праводзіцца балістычная экспертыза. У сюжэце гаворыцца, што ў затрыманага можа быць прыхаваны і «больш сур’ёзны тайнік».
Падчас размовы ў маладзёна выявіліся даволі шырокія веды ў галіне ўжывання зброі. Таксама гаворыцца, што ён быў чорным капальнікам.
Як сцвярджаюць журналісты каналу, у момант затрымання Лопух быў пад уздзеяннем наркатычных сродкаў. Як пазней прызнаваўся затрыманы, ён змагаецца з нарказалежнасцю ўжо 1,5 года.
Паводле Лопуха, ён ні да чаго не рыхтаваўся, а калекцыянаваў зброю, яна дэактываваная.
У той жа час у сюжэце выразна праводзіцца сувязь маладзёна з пратэстамі: маўляў, у 2014 годзе ў дачыненні да яго праводзіўся шэраг правяранняў, падчас якіх знайшлі «літаратуру нацысцкага кшталту, а таксама сімволіку пратэснай скіраванасці». Таксама гаворыцца, што Лопух пакідаў у інтэрнэце «негатыўныя каментары рознага кшталту, а таксама інструкцыі для вырабу выбуханебяспечных прадметаў і гаруча-змазачных матэрыялаў».
У сюжэце паказалі, які сілавікі затрымлівалі маці Лопуха, якая 9 жніўня 2020 года выходзіла на пратэсты, а таксама падчас іншых мітынгаў, кадры, знятыя на тэлефон, яна адпраўляла на «тэрарыстычныя рэсурсы».
Самога Лопуха таксама прымушаюць казаць на камеру, што ён трапіў пад уплыў «нямірнай прапаганды».
Раман Шавель belsat.eu
