Адзін цывільны загінуў, дзевяць атрымалі раненні.
Удзень 30 красавіка Расея зноў ударыла кіраванымі авіяцыйнымі бомбамі па жылых раёнах Харкава.
Кіраўнік Харкаўскай абласной вайсковай адміністрацыі Алег Сынегубаў паведаміў, што ў выніку расейскай атакі загінуў 24-гадовы мірны жыхар. Пацярпелі дзевяць чалавек, чацвёра з іх былі шпіталізаваныя з выбуховымі траўмамі (тры жанчыны і адзін мужчына).
Паводле Сынегубава, адна авіябомба трапіла ў Кіеўскі раён на тэрыторыю гаражнага кааператыву і адміністрацыйнага будынку непадалёк. Сорак гаражоў былі разбураныя, тры аўтамабілі загарэліся. Другая бомба ўпала ў Халаднагорскім раёне, былі пашкоджаныя два цывільныя будынкі.
Расейцы атакавалі авіябомбамі Кіеўскі раён Харкава другі дзень запар. У выніку ўчорашняга ўдару атрымаў раненні адзін чалавек.
Нагадаем, Расея пачала біць кіраванымі авіяцыйнымі бомбамі (КАБ) па Харкаве з канца сакавіка 2024 года. Раней агрэсар не выкарыстоўваў гэтых звышмагутных бомбаў супраць буйных гарадоў па-за лініяй фронту.
Выкарыстанне КАБаў супраць Харкава сталася вельмі сур’ёзным выклікам для ўкраінцаў, бо гэтая бомбы нельга знішчыць сродкамі паветранай абароны. Адзіная магчымасць супрацьстаяць КАБам – збіваць самалёты, якія іх скідваюць. Але зрабіць гэта вельмі складана, бо расейцы скідваюць бомбы на далёкай адлегласці, з уласнай паветранай прасторы.
Глеб Нержын belsat.eu
