Калі нібыта працаўнікі аператара тэлефануюць у мэсэнджары – гэта ўжо падазрона.
«Белтэлекам» папярэджвае беларусаў аб ашуканцах, якія прадстаўляюцца працаўнікамі кампаніі. Яны тэлефануюць у мэсэнджарах і прапаноўваюць усталяваць файл, які дае доступ да звестак на мабільнай прыладзе.
«На падставе неабходнасці падаўжэння дамовы ашуканцы прапаноўваюць усталяваць ці пераўсталяваць мабільны дадатак “Мой Белтэлекам” не з афіцыйнай крамы дадаткаў, а з APK-файлу, накіраванага асабістым паведамленнем у мэсэнджар. Такі файл з вялікай доляй верагоднасці шкодны, і пасля яго ўстаноўкі (абнаўлення прыкладання) мабільная прылада становіцца падкантрольная зламысніку», – піша «Белтэлекам».
Такім чынам махляры могуць атрымаць доступ да SMS, асабістай перапіскі ў мэсэнджарах і сацсетках, інфармацыю аб банкаўскіх картках і паролях.
,,«Зламыснікі таксама могуць усталёўваць іншыя дадаткі на мабільнай прыладзе, атрымліваць з іх дапамогай аддалены доступ да яе, афармляць банкаўскія і іншыя сэрвісы і паслугі», – адзначае «Белтэлекам».
Аператар папярэджвае, што яго працаўнікі ніколі не патэлефануюць праз мэсэнджары.
«Калі падчас размовы ў вас зʼявіліся сумненні, завяршыце званок і ператэлефануйце на афіцыйны нумар тэлефона РУП “Белтэлекам” – 123 (адзіны цэнтр абслугоўвання кліентаў).
Нават калі размова выглядае рэалістычнай, не рабіце ніякіх дзеянняў, прапанаваных ашуканцамі: не ўсталёўвайце ніякіх праграмаў з невядомых крыніцаў або дасланых вам у выглядзе файла.
Заўсёды звяртайце ўвагу на запытаныя дадаткам правы доступу да функцыяў тэлефона. Усе правы павінны быць мінімальныя і лагічна вытлумачальныя. Калі вас просяць ператэлефанаваць на прадыктаваны нумар, праігнаруйце гэтую прапанову», – рэкамендуе «Белтэлекам».
Калі вы маеце падазрэнні, што вы ўсё ж паддаліся хітрыкам махляроў, варта як мага хутчэй звярнуцца ў міліцыю.
Арсен Рудэнка belsat.eu
