«Ліст сапраўды быў і быў накіраваны на перадухіленне пагрозы».
Валерый Сахашчык пракаментаваў ліст з ягоным подпісам, дзе гаворыцца аб планаваных нападах на аб’екты крытычнай энергетычнай інфраструктуры Беларусі. Ён сцвярджае, што гэта было зроблена, каб перадухіліць магчымыя негатыўныя падзеі.
«Ліст аб магчымай правакацыі з атакай на беларускія абʼекты крытычнай энергетычнай інфраструктуры сапраўды меў месца і быў накіраваны на перадухіленне гэтай пагрозы», – піша Валерый Сахашчык.
Раней «Белсат» атрымаў доступ да ліста на бланку Дэпартаменту нацыянальнай бяспекі ў складзе Абʼяднанага пераходнага кабінету за подпісам Валерыя Сахашчыка. Там гаворыцца пра запланаваныя напады на абʼекты крытычнай энергетычнай інфраструктуры Беларусі. Быццам беларусы, якія звязаныя з Паспалітым рушэннем і «ліцвінамі», рыхтуюць ударны беспілотнік для таго, каб атакаваць абʼекты энергетычнай інфраструктуры ў Беларусі.
Тады Сахашчык пацвердзіў «Белсату», што ліст сапраўдны, але прасіў яго не публікаваць.
,,«Адпаведная інфармацыя была атрыманая з афіцыйных крыніцаў у кампетэнтных ведамствах шэрагу заходніх краінаў. У сувязі з гэтым, усе, хто мог быць неяк звязаны з гэтай сітуацыяй, былі апавешчаныя аб магчымых наступствах.
Мы не абвінавачвалі і не шкодзілі іміджу адрасатаў, а наадварот, зрабілі ўсё, што ў нашых сілах, каб перадухіліць вельмі негатыўныя для іх наступствы з боку заходніх краін-партнёраў, прычым выключна ў канфідэнцыйным парадку.
Такім чынам, гаворка ішла аб прафілактычным прававым інфармаванні, абароне жыццяў беларусаў і перадухіленні ваеннай эскалацыі, якая выключна ў інтарэсах Расеі. Зыходзячы з задачаў, якія стаяць перад Дэпартаментам нацыянальнай бяспекі Беларусі, мы і ў далейшым працягнем выконваць свае абавязкі для перадухілення любых правакацыяў, здольных нанесці шкоду беларусам і гуляць на руку рэжымам Лукашэнкі і Пуціна», – працягвае Сахашчык.
Ён адзначае, што шкоду «нашай агульнай справе» нанёс не дакумент, які ён падпісаў, а тыя, хто арганізавалі ўцечку ў СМІ і КДБ. 25 красавіка кіраўнік КДБ Іван Церцель заявіў, што камітэт нібыта «перадухіліў нанясенне ўдараў баявымі дронамі з тэрыторыі Літвы па абʼектах у Менску і яго прыгарадах». МЗС Літвы назваў гэта дэзынфармацыяй.
,,«Спецслужбы Лукашэнкі, у сваю чаргу, паводле даўняй традыцыі не прыдумалі нічога лепшага, як максімальна раздуць узровень пагрозы і прыпісаць сабе нейкія “вострыя чэкісцкія мерапрыемствы” для галачкі і прэміі. Тут якраз нічога дзіўнага – думаем, што беларусы даўно знаёмыя з звычкамі спецслужбаў рэжыму.
На заканчэнне я хацеў бы заклікаць незалежныя беларускія СМІ не публікаваць дакументаў з грыфам сакрэтнасці і не правакаваць тым самым канфліктных сітуацыяў унутры дэмакратычных сілаў. Толькі дзейнічаючы разам, стоячы плячом да пляча, мы можам супрацьстаяць ворагам беларускага народу – Пуціну і Лукашэнку, а не падыгрываць рэжыму дзеля рэйтынгаў і хайпу», – рэзюмуе Валерый Сахашчык.
Арсен Рудэнка belsat.eu
