Абраная прэзідэнтка і жонка Алеся Бяляцкага абмеркавалі шляхі да вызвалення палітвязняў.
Святлана Ціханоўская сустрэлася з жонкаю Нобэлеўскага лаўрэата, праваабаронцы Алеся Бяляцкага Наталляй Пінчук. «Удзячная за цёплую сустрэчу, падтрыманне і магчымасць падзяліцца супольным болем», – адзначыла абраная прэзідэнтка.
Святлана Ціханоўская і Наталля Пінчук – жонкі палітвязняў. Сяргей Ціханоўскі адбывае тэрмін у 19,5 года калоніі строгага рэжыму, Алесь Бяляцкі асуджаны на 10 гадоў узмоцненага рэжыму.
Як паведаміў Офіс абранай прэзідэнткі, на закрытай сустрэчы Ціханоўская і Пінчук размаўлялі пра асабістае – лёсы сужэнцаў, а таксама абмяркоўвалі шляхі да вызвалення палітвязняў і тое, як у гэтым можа дапамагчы міжнародная супольнасць.
«Я захапляюся стойкасцю і мужнасцю Наталлі, і ўдзячная ёй за цёплую сустрэчу, падтрыманне і магчымасць падзяліцца супольным болем. Пасля нашай размовы я ў чарговы раз упэўнілася ў тым, як важна працягваць распавядаць пра палітвязняў, дапамагаць ім і іхным сем’ям усімі магчымымі спосабамі. Як бы ні было складана, важна працягваць працаваць – не толькі дзеля сваіх любімых, але і дзеля ўсіх беларусаў, якія, як і Сяргей і Алесь, знаходзяцца за кратамі», – так сустрэчу пракаментавала Ціханоўская.
30 красавіка было абвешчана пра стварэнне ў Нарвегіі міжнароднага фонду для падтрымання вызваленых палітычных зняволеных з Беларусі і іхных сем’яў – гэта ініцыятыва абранай прэзідэнткі.
«Міністэрства замежных справаў будзе займацца практычным суправаджэннем дзейнасці гуманітарнага фонду ў цесным дыялогу з іншымі патэнцыйнымі донарамі і ўдзельнікамі», – адзначае прэс-служба МЗС Нарвегіі.
Краіна пералічыць у фонд 850 тысячаў еўраў.
Дзейнасць фонду будзе накіраваная ў тым ліку на медычную дапамогу і рэабілітацыю, наўпроставае фінансавае падтрыманне і псіхалагічную дапамогу вызваленым палітвязням і беларусам, якія зазналі палітычныя рэпрэсіі.
Цяпер, паводле цэнтру «Вясна», у Беларусі 1 387 палітвязняў, паводле падлікаў dissidentby, – 1 544.
Сцяпан Кубік belsat.eu
