Вайна ва Украіне. Падсумоўваем асноўныя падзеі на вечар 12 траўня.
«Белсат» падводзіць вынікі 809-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 12 траўня чытайце ў нашым аглядзе.
На поўначы Харкаўскай вобласці працягваецца наступ расейскіх вайскоўцаў, якія намагаюцца стварыць так званую буферную зону на ўкраінска-расейскім памежжы.
Ва ўкраінскім камандаванні паведамленні пра адбіццё 12 атак праціўніка ў ваколіцах населеных пунктаў Стрылеча, Краснае, Марахавец, Алейнікава, Лук’янцы і Пыльна ў Харкаўскім раёне і каля Бугруваткі, Гатышча, Плэтэніўкі і Ваўчанску ў Чугуеўскім.
Між тым у Міністэрстве абароны РФ заявілі, што сёлы Гатышча, Краснае, Марахавец і Алейнікава перайшлі пад іхны кантроль.
Аналітыкі праекту Deepstate пішуць, што таксама расейцы намагаюцца замацавацца сёлах Зялёнае і Глыбокае. Мяркуецца, што цяпер галоўнай задачай войскаў РФ у Харкаўскім раёне з’яўляецца выхад да населенага пункту Ліпцы, які знаходзіцца з поўдня ад Глыбокага.
У Чугуеўскім раёне аналітыкі пацвярджаюць выхад расейцаў да паўночных ваколіцаў гораду Ваўчанск. Агулам, на думку крыніцы, расейцы наступаюць на гэтым кірунку, каб вымусіць ЗСУ перакінуць рэзервы з іншых участкаў фронту.
Тым часам прарасейскія крыніцы сцвярджаюць, што войскі РФ ужо вядуць баі на тэрыторыі Ваўчанску.
Тэлеграм-канал «НгП раZVедка» піша, што адначасова з гэтым расейцы намагаюцца абысці горад з усходу цераз населеныя пункты Ваўчанскія Хутары і Зыбіна.
На купянскім кірунку Генштаб ЗСУ фіксуе 19 безвыніковых атак войскаў РФ каля сёлаў Сынькоўка, Новаягораўка, Іванаўка і Стэльмахаўка.
Мінабароны РФ піша, што самыя ЗСУ контратакавалі каля Сынькоўкі і Стэльмахаўкі, але не мелі поспеху.
Ініцыятыва войскаў РФ захоўваецца і на суседнім ліманскім кірунку, дзе яны прынамсі 10 разоў атакавалі каля Макееўкі, Неўскага і на тэрыторыі Серабранскага лясніцтва ў Луганскай вобласці, а таксама на поўначы Данецкай каля Новасадовага і Цернаў.
Праўкраінскі тэлеграм-канал «Говорять Снайпер» паведамляе пра моцны ціск расейцаў на так званым торскім выступе (участак фронту на левым беразе ракі Жарабец паміж населенымі пунктамі Церны і Торскае), дзе яны занялі дзве пазіцыі. Разам з тым крыніца адзначае, што агулам пакуль ЗСУ ўдаецца кантраляваць сітуацыю.
На сівэрскім кірункі расейцы атакуюць шырокім па лініі населеных пунктаў Белагораўка, Верхнякаменскае, Спірнае, Выемка і Раздолаўка, але пакуль не маюць істотных поспехаў.
На краматорскім кірункі асноўная актыўнасць войскаў РФ па-ранейшаму засяроджаная ў ваколіцах гораду Часаў Яр, на які яны наступаюць з усходу, а таксама намагаюцца абысці з флангаў.
Прарасейскі тэлеграм-канал «Рыбарь» сцвярджае, што за содні УС прасунуліся на тэрыторыі лецішчаў з поўдня ад мікрараёну «Новы» (частка гораду з каналам Северскі Данец – Данбас). Акрамя гэтага яны расшырылі зону кантролю ўздоўж трасы Н-32 (Бахмут – Канстанцінаўка) у ваколіцах заказніку «Ступкі-Галубоўскія-2».
Расейскі ваенкор Сямён Пегаў гаворыць, што таксама войскі РФ дасягнулі тактычных поспехаў на захадзе ад сяла Іванаўскае (на паўднёвым усходзе ад Часавага Яру) і аднавілі штурмавыя дзеянні ў суседняй Клішчыеўцы.
Мінабароны РФ фіксуе контратакі ўкраінцаў каля Іванаўскага.
Разам з тым тэлеграм-канал вайскоўцаў ЗСУ «Бахмутський Демон» піша, што пакуль праціўнік не можа прасунуцца на флангах гораду Часаў Яр.
На аўдзееўскім кірунку, паводле ўкраінскага камандавання, цягам апошніх содняў сілы абароны краіны адбілі не менш за 32 атакі праціўніка ў ваколіцах населеных пунктаў Сямёнаўка, Калінавае, Новааляксандраўка, Сокал, Яўгенаўка, Новапакроўскае, Навасёлаўка Першая, Уманскае і Нятайлава.
«Рыбарь» сцвярджае, што пры гэтым расейцы ўсё адно прасунуліся на паўночным фланзе кірунку на рубяжы Ачэрэтына – Архангельскае, падышлі да ўскрайкаў Новааляксандраўкі і прасунуліся ў бок Калінавага.
У Deepstate пішуць, што на навапаўлаўскім кірунку расейцы прасунуліся ў горадзе Краснагораўка, а таксама на самым поўдні каля сяла Уладзіміраўка (на паўднёвым усходзе ад гораду Вуглядар).
Таксама на кірунку фіксуюцца безвыніковыя атакі войскаў РФ каля сёлаў Канстанцінаўка, Салодкае і Вадзяное.
Высокая наступальная актыўнасць Узброеных сілаў РФ захоўваецца і на так званым урэмеўскім выступе на мяжы Данецкай і Запарожскай вобласцяў. Генштаб ЗСУ паведамляе пра адбіццё 16 атак праціўніка за содні ў ваколіцах сёлаў Ураджайнае і Старамаёрскае.
У цэнтральнай частцы Запарожскай вобласці баявыя дзеянні лакалізуюцца на выступе па фронце з поўдня ад гораду Арэхаў, але пакуль ніводнаму з бакоў канфлікту не ўдаецца істотна змяніць сітуацыю па лініі сутыкнення.
Адсутнічаюць змены і ў Херсонскай вобласці, дзе расейцы цягам апошніх содняў пяць разоў атакавалі пазіцыі Збройных сілаў на левым беразе Дняпра ў сяле Крынкі.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
