Вайна ва Украіне. Падсумоўваем асноўныя падзеі на вечар 22 траўня.
«Белсат» падводзіць вынікі 819-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 22 траўня чытайце ў нашым аглядзе.
На поўначы Украіны працягваюцца баі каля буйнога сяла Ліпцы і на тэрыторыі гораду Ваўчанск у Харкаўскім і Чугуеўскім раёнах адпаведна, але істотных зменаў лініі сутыкнення не фіксуецца.
Выданне BILD мяркуе, што ўкраінцам удалося спыніць праціўніка на гэтых участках фронту дзякуючы пастаўкам амерыканскай зброі.
Тым часам прарасейскі тэлеграм-канал «Военкор Котенок» піша, што прасоўванні войскаў РФ застопарыліся пры падыходзе да першых падрыхтаваных пазіцыяў праціўніка, акрамя гэтага ўкраінцы дасягнулі перавагі ў жывой сіле за кошт увядзення рэзерваў.
У Генеральным штабе Збройных сілаў Украіны паведамілі, што цягам апошніх содняў на купянскім кірунку Сілы абароны краіны адбілі шэраг атак праціўніка каля населеных пунктаў Сынькоўка, Бераставое і Іванаўка.
У гэты ж час на суседнім ліманскім кірунку расейскія вайскоўцы наступалі на левым беразе ракі Жарабец каля сёлаў Макееўка, Невельскае і Церны, але прасунуцца не здолелі.
Агулам, паводле ўкраінскага ведамства, сітуацыя на паўночным усходзе краіны застаецца кантраляванай.
У сваю чаргу Міністэрства абароны РФ заявіла пра паляпшэнне становішча сваіх вайскоўцамі на пярэднім краі ў ваколіцах сёлаў Іванаўка і Макееўка.
На сівэрскім кірункі расейцы ціснуць на ўсходзе аднайменнага выступу каля населеных пунктаў Белагораўка, Выемка і Раздолаўка, але пакуль значных поспехаў не маюць.
У гэты ж час цяжкая для ЗСУ сітуацыя назіраецца на краматорскім кірунку.
Аналітыкі праекту Deepstate фіксуюць прасоўванні Узброеных сілаў РФ у горадзе Часаў Яр.
Праўкраінскі тэлеграм-канал «Офіцер» удакладняе, што расейцы праводзяць масавыя штурмы і маюць поспех у мікрараёне з усходу ад каналу Сівэрскі Данец – Данбас.
Мінабароны РФ піша, што ніжэй па лініі сутыкнення пад іхны кантроль цалкам перайшла тэрыторыя зруйнаванага сяла Клішчыеўка (на поўдні ад гораду Бахмут).
Тэлеграм-канал «НгП раZVедка» сцвярджае, што агулам расейцы прасунуліся на адлегласць да аднаго кіламетра, а таксама выбілі ЗСУ з панавальнай вышыні 215,7 метра ў ваколіцах населенага пункту.
Адзначаецца, што ў такой сітуацыі ўкраінскія вайскоўцы пачалі адыход за канал у ваколіцах сяла Белая Гара.
Іншая прарасейская крыніца – «Рыбарь», – мяркуе, што поспехі войскаў РФ на краматорскім кірунку сталі вынікам перакідання часткі падраздзяленняў ЗСУ на поўнач Харкаўскай вобласці.
Ініцыятыва Узброеных сілаў РФ фіксуецца і на пакроўскім кірунку, дзе яны цягам апошніх содняў правялі не менш за 37 атак.
У Deepstate пішуць, што пры гэтым расейцы прасунуліся каля населеных пунктаў Сокал, Нятайлава і Салаўёва.
«Военкор Котенок» піша, што цяпер у Нятайлаве за ЗСУ застаўся апошні невялікі апорны пункт на поўдні сяла.
Тэлеграм-канал «Два майора» сцвярджае, што ўкраінцы пачалі адыход у бок суседняй Карлаўкі.
Расейскае камандаванне паведамляе пра адбіццё сямі контратак праціўніка каля сёлаў Архангельскае, Салаўёва, Нятайлава і Уманскае.
На курахаўскім кірунку працягваюцца баі ў горадзе Краснагораўка, а таксама ў ваколіцах сяла Парасковіеўка.
«Рыбарь» піша, што расейцы крыху расшырылі зону кантролю з поўдня ад апошняга населенага пункту, наступаючы ўздоўж лесапалосаў у бок суседняй Канстанцінаўкі.
Між тым вайскоўцы 46-й брыгады ЗСУ гавораць, што Сілам абароны Украіны ўпершыню за доўгі час удалося спыніць праціўніка на ўсіх асноўных участках кірунку.
На поўдні Данецкай вобласці расейцы зноў атакавалі на так званым урэмаўскім выступе каля сёлаў Ураджайнае і Старамаёрскае, але поспеху не мелі.
У Запарожскай вобласці УС РФ праводзяць штурмавыя дзеянні на выступе па фронце з поўдня ад гораду Арэхаў. «Рыбарь» фіксуе заняцце пазіцыяў на паўночных ускрайках зруйнаванага сяла Работына.
У Херсонскай вобласці расейцы тройчы безвынікова атакавалі на левым беразе Дняпра, імкнучыся выбіць ЗСУ з плацдарму ў ваколіцах сяла Крынкі.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
