Вайна ва Украіне. Падсумоўваем асноўныя падзеі на вечар 23 траўня.
«Белсат» падводзіць вынікі 820-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 23 траўня чытайце ў нашым аглядзе.
На поўначы Харкаўскай вобласці асноўныя баявыя дзеянні лакалізуюцца на двух участках фронту – у ваколіцах буйнога сяла Ліпцы і на тэрыторыі гораду Ваўчанск (у Харкаўскім і Чугуеўскім раёнах адпаведна).
Галоўнакамандуючы Збройнымі сіламі Украіны Аляксандр Сырскі заявіў, што на першым участку праціўнік панёс істотныя страты і перайшоў да актыўнай абароны.
У Ваўчанску расейцы таксама маюць сур’ёзныя страты, таму цяпер могуць перакінуць дадатковыя сілы з іншых кірункаў, каб працягнуць актыўныя штурмавыя дзеянні.
Тэлеграм-канал «Рыбарь» мяркуе, што ў Ваўчанску баі паступова набываюць пазіцыйны характар.
Між тым іншая прарасейская крыніца – «Архангел Спецназа» – сцвярджае, што цягам апошніх содняў войскі РФ прасунуліся ў ваколіцах Ліпцаў і ў Ваўчанску на адлегласць каля 500 і 400 метраў адпаведна.
Тэлеграм-канал «Два майора» таксама піша пра поспехі расейцаў, а таксама фіксуе перакіданне рэзерваў ЗСУ з іншых участкаў фронту, пры дапамозе якіх украінскае камандаванне разлічвае адкінуць праціўніка да дзяржаўнай мяжы.
На купянскім кірунку, паводле Генеральнага штабу Збройных сілаў Украіны, цягам апошніх содняў сілы абароны адбілі шэраг атак праціўніка каля населеных пунктаў Бераставое, Макееўка, Стэльмахаўка і Грэкаўка.
Сырскі гаворыць, што таксама расейцы працягваюць ціснуць у лясным масіве з поўначы ад Купянску. Акрамя гэтага назіраецца складаная сітуацыя ў ваколіцах сяла Кіслоўка, дзе УС РФ намагаюцца прарваць абарону ўкраінцаў і выйсці да ракі Аскіл.
Між тым прарасейскі тэлеграм-канал «НгП раZVедка» мяркуе, пакуль на апошнім участку перад Узброенымі сіламі РФ стаіць больш лакальная задача: тут яны рухаюцца з поўначы ад сяла да суседняй Іванаўкі, на паўднёвых ускрайках якой ужо праводзіцца выведка боем.
На ліманскім кірунку расейцы наступаюць на левым беразе ракі Жарабец, імкнучыся выбіць ЗСУ з займанага плацдарму, а таксама на тэрыторыі Серабранскага лясніцтва (на паўднёвым захадзе ад гораду Крэмінная ў Луганскай вобласці). Пакуль лінія сутыкнення застаецца нязменнай.
З поўдня ад ракі Сівэрскі Данец расейцы ціснуць у ваколіцах населеных пунктаў Белагораўка, Выемка і Верхнякаменскае, але прасоўванняў за апошнія содні не маюць.
Больш складаная для ЗСУ сітуацыя назіраецца на краматорскім кірунку, расейцы маюць лакальныя поспехі.
Аналітыкі праекту Deepstate фіксуюць прасоўванні расейцаў каля гораду Часаў Яр і ў сяле Клішчыеўка.
«Рыбарь» сцвярджае, што ў самім Часавым Яры УС РФ удалося зачапіцца за вышынную забудову на ўсходзе гораду.
Канал «Два майора» піша, што адначасова з гэтым расейцы расшыраюць зону кантролю ў лясным масіве з поўдня ад гэтай часткі гораду.
Яшчэ адна прарасейская крыніца – тэлеграм-канал «Военкор Котенок» – паведамляе, што Узброеныя сілы РФ перайшлі канал Сівэрскі Данец – Данбас і замацаваліся на заходнім беразе.
Тым часам у Міністэрстве абароны РФ заявілі, што ніжэй па лініі сутыкнення пад іхны кантроль перайшло сяло Андрэеўка (з поўдня ад Клішчыеўкі).
На пакроўскім кірунку сітуацыя таксама застаецца напружанай – тут Сілы абароны краіны адбілі не менш за 25 атак праціўніка за содні.
Расейскі ваенкор Сямён Пегаў гаворыць, што войскі РФ аднавілі рух у бок населеных пунктаў Сокал і Новааляксандраўка, а таксама амаль выбілі праціўніка з сёлаў Нятайлава і Уманскае.
Тым часам канал «Два майора» мяркуе, што Нятайлава ўжо цалкам знаходзіцца пад кантролем УС РФ.
На курахаўскім кірунку актыўнасць расейцаў лакалізуецца ў ваколіцах населеных пунктаў Краснагораўка, Георгіеўка, Канстанцінаўка, Парасковіеўка і Новаміхайлаўка.
У Deepstate прызнаюць прасоўванні войскаў РФ у Краснагораўцы. Прарасейскія крыніцы ўдакладняюць, што Узброеныя сілы РФ занялі забудову на захадзе ад цагельнага заводу, але ЗСУ пакуль захоўваюць пазіцыі ў шматпавярховых дамах у паўночнай частцы гораду.
На поўдні Данецкай вобласці расейцы наступаюць на так званым урэмаўскім выступе каля сёлаў Ураджайнае і Старамаёрскае.
«Рыбарь» сцвярджае, што на паўднёвых ускрайках першага населенага пункту войскі РФ занялі каля 10 прыватных дамоў, у гэты ж час у Старамаёрскім яны прасунуліся на адлегласць да 1,5 кіламетра, заняўшы чатыры апорныя пункты ўкраінцаў.
У цэнтральнай частцы Запарожскай вобласці баявыя дзеянні ідуць на выступе па фронце з поўдня ад гораду Арэхаў, але істотных зменаў лініі сутыкнення не фіксуецца.
У Херсонскай вобласці, паводле Генштабу ЗСУ, расейцы атакуюць на левым беразе Дняпра каля сяла Крынкі, але поспеху не маюць.
Між тым праўкраінскі тэлеграм-канал «Говорять Снайпер» паведамляе, што Збройныя сілы выйшлі з плацдарму ў сяле Крынкі і замацаваліся на іншым, больш прыдатным для вядзення абароны, участку на левабярэжжы.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
