Агляд рэпрэсіяў за 27 траўня.
Новыя затрыманні і суды, а таксама рабаванне маёмасці кандыдатаў на выбарах у Каардынацыйную раду. Новы агляд пераследу рэжымам сваіх апанентаў.
У дачыненні да палітзняволенай Аляксандры Каско ўзбуджаная новая крымінальная справа – па артыкулах аб абразе прадстаўніка ўлады і суддзі. Суд пачнецца 31 траўня ў судзе Ленінскага раёну Горадні, паведамляе праваабарончы цэнтр «Вясна».
Аляксандру затрымалі ў лютым 2023 года пасля вяртання з Польшчы. У снежні мінулага года Гарадзенскі абласны суд прыгаварыў яе да 10 гадоў пазбаўлення волі. Яна ўнесена ў спіс «экстрэмістаў» і «тэрарыстаў».
Аляксандру абвінавачвалі па васьмі артыкулах: арт. 369 («Знявага прадстаўніка ўлады»); ст. 391 («Знявага суддзі або народнага засядацеля»); ч. 1, 2 арт. 368 («Абраза Лукашэнкі»); ч. 1, 2 арт. 361-1 («Стварэнне экстрэмісцкага фармавання або ўдзел у ім»); ч. 1, 2 арт. 361-4 («Садзеянне экстрэмісцкай дзейнасці»); ч. 2 арт. 367 («Паклёп у дачыненні да Лукашэнкі»); ч. 3 арт. 203-2 («Незаконныя дзеянні ў дачыненні да інфармацыі аб прыватным жыцці і персанальных дадзеных»); ч. 3 арт. 130 («Распальванне расавай, нацыянальнай, рэлігійнай або іншай сацыяльнай варожасці або варожасці»).
Улады працягваюць запалохваць грамадзянскую супольнасць, публікуючы відэаздымкі і фатаграфіі арыштаваных кватэр сябраў Каардынацыйнай рады.
Праўладны тэлеграм-канал апублікаваў фатаграфіі апячатаных следчым камітэтам кватэр, а таксама відэазапісы, на якіх работнікі жыллёва-камунальнай гаспадаркі і супрацоўнікі міністэрства па надзвычайных сітуацыях пры дапамозе спецыяльнага інструмента ўзломваюць дзверы кватэр людзей, якія пераследуюцца ўладамі за палітычныя погляды.
Пры гэтым тое, што адбываецца, суправаджаецца здзеклівымі каментарамі прапагандыстаў: «Новыя карцінкі апячатаных дзвярэй пасля накладання арышту на нерухомасць удзельнікаў экстрэмісцкага фармавання «КР». Кватэркі хутка сыдуць з малатка для пагашэння нанесенай нашай краіне шкоды».
Сілавікі апублікавалі відэа з затрыманымі. На камеру мужчына гаворыць, што з’яўляецца дырэктарам івэнт-агенцтва «Графіміл», а ягоная жонка працуе там жа інструктаркай па танцах. Сужонцы «прызнаюцца», што былі падпісаныя на «экстрэмісцкія» рэсурсы, а таксама нібыта рэгістраваліся ў чат-боце «Перамога».
Паводле даных Міністэрства культуры, івэнт-агенцтва «Графіміл» зарэгістраванае на Сяргея Сарокіна, піша «Медыязона».
Сілавікі апублікавалі відэа пра затрыманне мянчанкі, якая адміністравала чат дыяспары «Беларусы ў Турцыі». «Беларусы ў Турцыі» уваходзіць у сетку чатаў dze.chat. На камеру дзяўчына кажа, што ў 2020 годзе «звярталася ў экстрэмісцкія чат-боты». Па якім артыкуле затрымана дзяўчына, невядома.
Гэта – Насця Мацяш, Аляксандр Максімовіч, Сяргей Высоцкі, Максім Хвашчынскі, Павел Лукашэвіч, Вадзім Рушкевіч. Паводле «Вясны», па стане на 27 мая ў Беларусі 1401 палітвязень. Праект Dissidentby ацэньвае колькасць палітвязняў у 1553 чалавек.
Ася Саковіч belsat.eu
