Яшчэ трое дзяржслужбоўцаў пацярпелі.
У Белгародскай вобласці Расеі загінуў намеснік кіраўніка адміністрацыі Карачанскага раёну. Як паведаміў губернатар Вячаслаў Гладкоў, гэта здарылася «у выніку дэтанацыі боепрыпаса».
«У выніку дэтанацыі боепрыпаса загінуў намеснік кіраўніка адміністрацыі Карачанскага раёну, сакратар рады бяспекі раёну Ігар Нечыпарэнка», – напісаў губернатар Белгародскай вобласці Вячаслаў Гладкоў у сваім Telegram-канале.
Акрамя таго, у выніку выбуху пацярпеў старшыня гэтай раённай адміністрацыі і кіраўнікі двух сельскіх паселішчаў. Ім надалі медычную дапамогу, «цяпер усе яны знаходзяцца на сваіх працоўных месцах», адзначыў губернатар.
Акалічнасці здарэння ён не раскрыў.
Гладкоў таксама паведаміў, што ў горадзе Шабекіне падчас сённяшняга абстрэлу раненні атрымалі 6 жыхароў, іх шпіталізавалі.
Тым часам у Паветраных сілах ЗСУ праінфармавалі, што ўначы краіну атакавалі 25 беспілотнікаў і дзве ракеты, 24 дроны былі збітыя. Раніцою быў знішчаны яшчэ адзін беспілотнік. Звестак пра наступствы гэтай атакі няма.
Сцяпан Кубік belsat.eu
