Вайна ва Украіне. Падсумоўваем асноўныя падзеі на вечар 7 чэрвеня.
«Белсат» падводзіць вынікі 835-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 7 чэрвеня чытайце ў нашым аглядзе.
На поўначы Харкаўскай вобласці асноўныя баявыя дзеянні па-ранейшаму лакалізуюцца на двух участках фронту: на поўнач ад буйнога сяла Лыпці і на тэрыторыі гораду Ваўчанск (у Харкаўскім і Чугуеўскім раёнах адпаведна). Расейскі ваенкар Сямён Пегаў гаворыць, што, нягледзячы на высокую інтэнсіўнасць баёў, істотных зменаў на лініі сутыкнення не адзначаецца.
У гэты ж час прарасейскі тэлеграм-канал «Два майора» сцвярджае, што акрамя гэтага Узброеныя сілы РФ атакавалі на яшчэ адным участку фронту ў Харкаўскім раёне – каля сяла Зялёнае – і занялі панавальныя вышыні ў лясным масіве на захад ад населенага пункту.
У Генеральным штабе Збройных сілаў Украіны паведамілі, што цягам апошніх содняў на купянскім кірунку сілы абароны краіны адбілі шэраг атак праціўніка ў ваколіцах населеных пунктаў Сынькоўка, Пішчанае, Дружэлюбаўка і Грыгораўка. Стратаў пазіцыяў не адбылося.
Тым часам аналітыкі праекту «Deepstate» фіксуюць захоп расейцамі сяла Іванаўка ў Купянскім раёне, пра заняцце якога яшчэ 27 траўня заяўлялі ў Міністэрстве абароны РФ.
Канал «Два майора» ўдакладняе, што цяпер войскі РФ замацаваліся на ўчастку на поўнач ад населенага пункту шырынёю да двух кіламетраў і глыбінёю каля аднаго.
На суседнім, ліманскім кірунку наступальныя дзеянні расейцаў назіраюцца на левым беразе ракі Жарабец у Данецкай вобласці каля сёлаў Новасадовае, Тэрны, Торскае і Ямпаль, а таксама на тэрыторыі Сэрэбранскага лясніцтва на Луганшчыне. Тут лінія фронту застаецца нязменнаю.
На так званым сівэрскім выступе Узброеныя сілы РФ цягам содняў намагаліся прарваць абарону ўкраінцаў каля населеных пунктаў Белагораўка і Верхнякаменскае, але поспеху не дасягнулі.
На краматорскім кірунку расейцы атакуюць каля сёлаў Калінаўка, Іванаўскае і Клішчыеўка, а таксама штурмуюць усходнюю частку гораду Часаў Яр. У Генштабе ЗСУ адзначаюць, што сітуацыя застаецца напружанаю.
Прарасейскія крыніцы пішуць, што пры гэтым вайскоўцам ЗСУ ўдалося выявіць маршрут праціўніка да Часавага Яру з поўдня: тут войскам РФ працяглы час удавалася незаўважна выходзіць з ляснога масіву каля Іванаўскага і рухацца ўздоўж надземнай часткі – вялізнай трубы – каналу Сівэрскі Данец – Данбас. Імаверна, цяпер лагістыка для расейцаў на гэтым участку фронту зробіцца больш праблематычнай.
Выданне «BILD» паведамляе, што Збройныя сілы Украіны контратакавалі на поўначы ад гораду і вярнулі пад свой кантроль сяло Калінаўка. Адпаведна, тэрыторыя вакол каналу на паўночным флангу зноў за ўкраінцамі.
На пакроўскім кірунку баявыя дзеянні ідуць шырокім фронтам на захадзе ад гораду Аўдзееўка.
Генштаб ЗСУ фіксуе шэраг безвыніковых атак праціўніка каля населеных пунктаў Новааляксандраўка, Яўгенаўка, Сокіл і Яснабродаўка.
Пегаў гаворыць, што расейцы ціснуць таксама каля Карлаўкі, канал «Два майора» паведамляе пра наступ на поўнач ад Уманскага. Яшчэ адна прарасейская крыніца – тэлеграм-канал «Фронтовая птичка» – сцвярджае, што на апошнім участку УС РФ прарвалі абарону ўкраінцаў і прасунуліся да паўднёвых участкаў Навасёлаўкі Першай.
На курахаўскім кірунку працягваюцца вулічныя баі ў Краснагораўцы, але лінія сутыкнення застаецца без зменаў. Тэлеграм-канал «Говорять Снайпер» мяркуе, што ЗСУ ўдалося стабілізаваць гэты ўчастак коштам ужывання FPV-дронаў і дыстанцыйнага мініравання мясцовасці.
Яшчэ адна праўкраінская крыніца – «Офіцер» – піша, што сітуацыя стабільная і ніжэй на фронце, у сяле Георгіеўка: тут расейцы па-ранейшаму кантралююць усходнюю частку, але прасоўвацца далей не спрабуюць. Акрамя гэтага, у войскаў РФ назіраюцца істотныя праблемы з забеспячэннем і перакідваннем свежых сілаў, бо дарога да сяла з Мар’інкі цалкам прастрэльваецца артылерыяй і БпЛА ЗСУ.
Далей на поўдзень актыўнасць Узброеных сілаў РФ лакалізуецца ў ваколіцах сёлаў Касцянтынаўка і Парасковіеўка. У Мінабароны РФ заявілі, што апошні населены пункт быў заняты іхнымі вайскоўцамі цягам апошняга тыдня, аднак праўкраінскія крыніцы пакуль не пацвярджаюць гэтай інфармацыі.
На так званым урэмаўскім выступе (на мяжы Данецкай і Запарожскай вобласцяў) расейскія вайскоўцы штурмуюць поўнач сяла Старамаёрскае і паўднёвыя ўскрайкі суседняга Уражайнага – пакуль без істотных поспехаў.
Адсутнічаюць змены і ў цэнтральнай частцы Запарожскай вобласці, дзе УС РФ наступаюць у ваколіцах гораду Арэхаў.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
