Пробашч парафіі ў Шуміліне застаецца ў няволі ўжо больш за месяц.
Праз месяц пасля затрымання, якое адбылося 8 траўня, пробашч рымска-каталіцкай парафіі ў Шуміліне айцец Анджэй Юхневіч не выйшаў на волю. Пра гэта паведамляе katolik.life.
Ксяндза Анджэя Юхневіча, імаверна, пакаралі адміністратыўным арыштам трэці раз запар. Раней яму двойчы прызначалі 15 содняў арышту.
Новы тэрмін і абвінавачванне, а таксама абвінавачванне паводле другога пратаколу пакуль застаюцца невядомыя. Першы раз святара асудзілі нібыта за «несанкцыянаванае пікетаванне». Святару паставілі ў віну тое, што раней ён размясціў на фота свайго профілю Facebook выяву бела-чырвона-белага сцягу і сцягу Украіны.
Фота профілю са значкамі, пра якія ідзе гаворка, святар абнаўляў больш за два гады таму. 26 лютага 2022 года на фота профілю пробашча з’явіўся значок са сцягам Украіны, у той жа дзень ён змяніў яго на выяву голуба міру. Аднак усё роўна быў прызнаны вінаватым і асуджаны на максімальны тэрмін адміністратыўнага арышту.
Глеб Нержын belsat.eu
