Старшакласнікам пакажуць, як вымяраць ціск і аказваць першую дапамогу.
Міністэрства адукацыі Беларусі зацвердзіла навучальную праграму новага факультатыву для старэйшых класаў школы. Адпаведная пастанова апублікаваная на Нацыянальным прававым інтэрнэт-партале.
Назва новага факультатыву – «увядзенне ў медычную прафесію». Агулам праграма разлічаная на 68 гадзінаў: 35 у дзясятым і 33 у адзінаццатым класе.
У прыватнасці, падчас практычных заняткаў школьнікаў навучаць падлічваць пульс і частату дыхальных рухаў да і пасля фізічнай нагрузкі, а таксама вымяраць артэрыяльны ціск. Акрамя таго, старшакласнікам пакажуць, як накладаць мяккія бінтавыя павязкі на розныя часткі цела. Асобнай тэмай практычных і тэарэтычных заняткаў будзе аказанне першай медычнай дапамогі.
У рамках курсу прадугледжаныя экскурсіі ў лякарні, паліклінікі, станцыі хуткай дапамогі, установы медычнай рэабілітацыі і аптэкі.
Як зазначаецца ў пастанове, мэта факультатыву – «стварэнне ўмоваў для ўсвядомленага выбару патрэбы ў прафесійным самавызначэнні».
Глеб Нержын belsat.eu
