Людзей пераследуюць за падпіскі ў сацсетках.
Праваабарончы цэнтр «Вясна» постфактум даведаўся пра шэраг выпадкаў адміністратыўнага пераследу беларусаў, якія вярнуліся з-за мяжы.
Гэтак, у Воранаве 3 траўня асудзілі бацьку няпоўнагадовага дзіця. Падставай для затрымання стала падпіска ва «Вконтакте» на «экстрэмісцкія групы». Яго прызналі вінаватым паводле арт. 19.11 КаАП і прызначылі яму 1 200 рублёў штрафу (30 базавых велічыняў).
Таксама ў Воранаве 6 траўня асудзілі і маці двух маленькіх дзяцей. Яе асудзілі за «распаўсюд экстрэмісцкіх матэрыялаў» за падпіску ў Фэйсбуку. Яе асудзілі да штрафу памерам 800 рублёў (20 базавых велічыняў).
А ў Ашмянах 3 траўня адбыўся суд над мужчынам, у якога ў тэлефоне знайшлі падпіскі на «экстрэмісцкія каналы». Вынік – штраф у 1 200 рублёў (30 базавых велічыняў).
Падрабязнасці затрыманняў гэтых людзей праваабаронцы не паведамляюць.
Глеб Нержын belsat.eu
