Перад «Варшаўскім мостам» налічылі 300 легкавікоў.
У Берасці ў чарзе на выезд у Польшчу налічылі 300 легкавікоў – гэта звесткі Памежнага камітэту Беларусі на 8:00 раніцы. У чатах пішуць, што на мінанне мяжы сыходзіць 27–29 гадзінаў.
Як паведамляе Памежны камітэт, а 8:00 раніцы ў чарзе перад «Варшаўскім мостам» налічвалася 300 легкавікоў, у «Каменным Лозе» – 110, у «Беняконях» – 70, у «Грыгораўшчыне» – пуста.
Паводле сведчанняў у Telegram-чатах, беларуска-польскую мяжу цяпер мінаюць за 27–29 гадзінаў. У аўторак, як пісалі падарожнікі, былі затрымкі і на шляху ў Беларусь, чакаць даводзілася каля 9–10 гадзінаў. Наракалі на беларускіх мытнікаў:
,,«Дагляд у нашых – вельмі пільны».
Праз «Каменны Лог» у Літву «прарываюцца» прыкладна за 11 гадзінаў. Дадому, як паведамляюць падарожнікі, вялікіх чэргаў няма, аднак і тут беларускія службоўцы старанна даглядаюць рэчы:
,,«Поўны дагляд і пакупкі на шалі».
У «Беняконях» усё кепска, як і ў Берасці: тыя, хто сёння мінуў мяжу, правялі ў чарзе каля 30 гадзінаў. Пішуць, што «літоўцы вельмі марудна працуюць», прапускаюць у сярэднім пяць аўтаў за гадзіну.
Шлях у ЕЗ праз «Грыгораўшчыну» – самы хуткі. Увечары ў аўторак там была чарга з 50 легкавікоў, падарожнікі чакалі 9–15 гадзінаў, сёння раніцай там пуста, на мінанне мяжы спатрэбіцца 50 хвілінаў.
Паводле Памежнага камітэту, аўтобусная чарга на выезд з Беларусі ёсць толькі ў Берасці (там іх 12). Чакаюць каля 10 гадзінаў.
У «Каменным Лозе» мяжу мінаюць за пяць гадзінаў. «На дзіва хутка», – пішуць пасажыры аўтобусаў.
Аўтобусам праз «Беняконі» – самы шпаркі варыянт, чакаць даводзіцца толькі 3–3,5 гадзіны.
Сцяпан Кубік belsat.eu
