На думку палітыка, гэта прымусіць Лукашэнку пайсці на саступкі.
Кіраўнік НАУ Павел Латушка пракаментаваў заяву міністра замежных справаў Польшчы, які не выключыў закрыццё ўсіх пунктаў пропуску на мяжы з Беларуссю. Латушка адзначыў, што важна захаваць для беларусаў магчымасць ездзіць у ЕЗ.
Старшыня НАУ, намеснік кіраўніцы Аб’яднанага пераходнага кабінету і дэлегат Каардынацыйнай рады Павел Латушка падтрымаў ідэю закрыць усе грузавыя пераходы на беларуска-польскай мяжы. На ягоную думку, гэта можа паспрыяць таму, што Лукашэнка «спыніць суўдзел у агрэсіі Расеі супраць Украіны, спыніць масавыя рэпрэсіі ў дачыненні беларусаў, вызваліць палітвязняў, спыніць гібрыдную вайну з выкарыстаннем мігрантаў».
«Адначасова мы выступаем за тое, каб працягвалі дзеяць пасажырскія пункты пропуску для грамадзянаў Беларусі дзеля таго, каб захаваць магчымасць камунікацыі беларусаў з ЕЗ», – адзначыў Латушка.
Раней міністр замежных справаў Польшчы Радослаў Сікорскі не выключыў закрыцця ўсіх пераходаў на мяжы з Беларуссю:
,,«Мы зараз вывучаем, якія наступствы гэта будзе мець для нашай эканомікі, каб менавіта Лукашэнка адчуў наступствы, а не мы».
Дыпламат сказаў так у эфіры тэлеканалу TVN24 у адказ на пытанне, якія захады можа прыняць Польшча ў адказ на ціск нерэгулярных мігрантаў.
Паводле Сікорскага, сітуацыя з мігрантамі з боку Беларусі «цалкам кантралюецца расейскімі і беларускімі службамі».
«Шакуе тое, што гэтыя людзі атрымоўваюць інструкцыі ад афіцэраў беларускай дзяржавы, як зарэзаць польскага жаўнера, польскага памежніка. Гэта цалкам непрымальна», – падкрэсліў кіраўнік МЗС.
Ён пры гэтым не ўдакладніў, якія пункты пропуску Польшча можа закрыць, пасажырскія ці грузавыя, аднак згадаў досвед Фінляндыі, калі нерэгулярныя мігранты пачалі ехаць туды з тэрыторыі Расеі:
«Фіны закрылі памежныя пераходы з Расеяй, і ўсё скончылася».
Цяпер на беларуска-польскай мяжы застаюцца адкрытымі толькі два аўтадарожных пункты пропуску ў Берасці: пасажырскі «Варшаўскі мост – Тэрэспаль» і грузавы «Казловічы – Кукурыкі». Пры гэтым паміж краінамі захоўваецца грузавое чыгуначнае спалучэнне, хаця пасажырскія цягнікі не ходзяць з 2020 года.
Сцяпан Кубік belsat.eu
