Бліжэйшым часам плануюцца кансультацыі з польскімі ўладамі.
Прадстаўнік у міжнародных справах Аб’яднанага пераходнага кабінету Валер Кавалеўскі паведаміў «Белсату», што бліжэйшым часам ініцыюе кансультацыі з польскімі ўладамі, каб на мяжы з Беларуссю не закрыўся адзіны пасажырскі пункт пропуску. Так Кавалеўскі адрэагаваў на пагрозу міністра замежных справаў Польшчы спыніць рух людзей праз мяжу.
«Для рэжыму Лукашэнкі інтарэсы беларусаў як фізічных асобаў не маюць асаблівага значэння; інтарэсы беларусаў – прыярытэт для дэмакратычных сілаў», – сказаў «Белсату» прадстаўнік у міжнародных справах Пераходнага кабінету Валер Кавалеўскі, адзначыўшы, што закрыццё на беларуска-польскай мяжы пунктаў пропуску для пасажыраў аніяк не паўплывае на тых, хто лічыць сябе ўладаю ў Менску, і не спыніць міграцыйны ціск.
,,«Тое, што б сапраўды паўплывала на рэжым Лукашэнкі, – абмежаванне магчымасцяў зарабляць на гандлі з ЕЗ, бо гэтыя прыбыткі ідуць на фінансаванне рэпрэсіўнага апарата. Закрыццё мяжы для гандлю з ЕЗ, а тым больш для транзіту праз Беларусь, было б вельмі-вельмі балючым для рэжыму», – упэўнены Кавалеўскі.
Ён падкрэсліў, што раней уведзеныя санкцыі «нясуць досыць сур’ёзныя страты для рэжыму». «Яны спрабуюць іх прыхаваць ці нейкім чынам кампенсаваць за кошт Расеі, але яны вельмі баяцца санкцыяў», – сказаў дыпламат.
Паводле прадстаўніка Кабінету, важна захаваць для беларусаў магчымасць ездзіць у Еўразвяз, каб падтрымоўваць сувязі, каб развівацца, каб падкрэсліваць «прыналежнасць да еўрапейскай сям’і»:
«Мы прапануем паляпшаць візавыя практыкі для беларусаў, каб яны лягчэй атрымлівалі візы для наведвання Польшчы і агулам ЕЗ. Тут мы працуем з нацыянальнымі ўрадамі, з Еўракамісіяй. Пазіцыя кабінета – абмежаванні ў гандлі, але не ў паездках беларусаў – застаецца актуальнай ад жніўня мінулага года, калі АПК накіроўваў ліст урадам Польшчы, Латвіі, Літвы, Эстоніі, у Еўрапейскую камісію. З улікам вяртання да разгляду такой магчымасці планую запрасіць адпаведныя кансультацыі з польскімі ўладамі найбліжэйшым часам».
Абраная прэзідэнтка Святлана Ціханоўская ў сваім акаўнце ў X.com напісала, што трэба захаваць мабільнасць беларусаў і іх сувязі з Еўразвязам :
,,«Ініцыятывы ў абмежаванні прымежнага руху з увагі на працяглыя правакацыі рэжыму мусяць быць накіраваныя супраць дыктатара, а не супраць народу. Мы не можам кінуць беларусаў на волю лёсу за новай жалезнай заслонаю».
Намеснік Ціханоўскай у Аб’яднаным пераходным кабінеце Павел Латушка падтрымаў ідэю закрыць на польска-беларускай мяжы ўсе пераходы, акрамя пасажырскіх:
«Мы выступаем за тое, каб працягвалі дзеяць пасажырскія пункты пропуску для грамадзянаў Беларусі дзеля таго, каб захаваць магчымасць камунікацыі беларусаў з ЕЗ».
22 чэрвеня міністр замежных справаў Польшчы Радослаў Сікорскі ў эфіры тэлеканалу TVN24 не выключыў закрыцця ўсіх пераходаў на мяжы з Беларуссю:
,,«Мы зараз вывучаем, якія наступствы гэта будзе мець для нашай эканомікі, каб менавіта Лукашэнка адчуў наступствы, а не мы».
Так дыпламат адказаў на пытанне, якія захады можа прыняць Польшча ў адказ на ціск нерэгулярных мігрантаў.
Сікорскі пры гэтым не ўдакладніў, якія пункты пропуску Польшча можа закрыць, пасажырскія ці грузавыя, аднак згадаў досвед Фінляндыі, калі мігранты пачалі ехаць туды з тэрыторыі Расеі:
«Фіны закрылі памежныя пераходы з Расеяй, і ўсё скончылася».
Цяпер на беларуска-польскай мяжы застаюцца адкрытымі толькі два аўтадарожных пункты пропуску ў Берасці: пасажырскі «Варшаўскі мост – Тэрэспаль» і грузавы «Казловічы – Кукурыкі». Пры гэтым паміж краінамі захоўваецца грузавое чыгуначнае спалучэнне, хаця пасажырскія цягнікі не ходзяць з 2020 года, калі пачалася пандэмія.
Сцяпан Кубік belsat.eu
