Паводле звестак ДПК Беларусі, больш за ўсё літоўцаў, менш за ўсё палякаў.
Паводле звестак Дзяржаўнага памежнага камітэту Беларусі, больш за ўсё літоўцаў, менш за ўсё палякаў.
З пачатку гэтага года такім правам скарысталіся 107,3 тысячы еўрапейцаў: 47,7 тысячы грамадзянаў Літвы, 27,9 тысячы – грамадзянаў Латвіі, 8,3 тысячы асобаў з відам на жыхарства ў Латвіі, а таксама 23,4 тысячы грамадзянаў Польшчы.
Паводле аналагічнай статыстыкі за 2023 год, у Беларусь уехалі 413,4 тысячы чалавек, у 2022 годзе – амаль 385 тысяч. Выходзіць, з кожным годам ахвочых скарыстацца беларускім бязвізам становіцца ўсё менш.
Усяго з пачатку дзеяння бязвізу ў Беларусь прыехалі амаль 908 тысячаў замежнікаў. Больш за палову (543 тысячы) – літоўцы, палякаў менш за 88 тысячаў.
Нагадаем, бязвіз для літоўцаў і латышоў увялі 15 красавіка 2022 года, для палякаў – 1 ліпеня 2022 года. Дзее ён пакуль да канца 2024 года.
Уехаць без візы ў Беларусь на тэрмін да 30 дзён некаторыя замежныя турысты могуць праз аэрапорты, а на тэрмін да 15 дзён – і праз сухапутную мяжу.
Такое права ёсць у грамадзянаў Польшчы і Літвы, а таксама грамадзянаў Латвіі і асобаў з відам на жыхарства ў гэтай краіне. Пры наяўнасці зваротнага білета на самалёт і шматразовай візы ЕЗ (або шэнгенскай візы) без спецыяльнай візы ў Беларусь могуць прыязджаць таксама грамадзяне Намібіі, Гаіці, В’етнаму, Ірану, Лівану, Пакістану і некаторых іншых дружалюбных для беларускіх уладаў краінаў. Колькі асобаў прыехала з гэтых краінаў – ДПК не паведаміў.
Паводле прэс-службы Лукашэнкі, дзеянне бязвізу ў 2022–2023 гадах «паказала ўстойлівую цікавасць жыхароў сумежных дзяржаваў да наведвання Рэспублікі Беларусь», нават нягледзячы на закрыццё наземных пунктаў пропуску і адсутнасць беспасярэдняга авіязлучэння. Маўляў, паездкі без візы ў Беларусь выгадныя пенсіянерам і маламаёмным з прымежных зонаў, для іх гэта «ўстойлівая крыніца атрымання неабходных тавараў і медыкаментаў».
Пры гэтым улады Польшчы, Літвы і Латвіі заклікалі сваіх грамадзянаў адмовіцца ад паездак у Беларусь, каб не зрабіцца «аб’ектам правакацыяў з боку беларускіх спецслужбаў».
Тэса Анэйда belsat.eu
