Вайна ва Украіне. Падсумоўваем асноўныя падзеі на вечар 3 ліпеня.
«Белсат» падводзіць вынікі 861-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 3 ліпеня чытайце ў нашым аглядзе.
На поўначы Харкаўскай вобласці працягваюцца баі на двух асноўных участках фронту – каля сяла Глыбокае і на тэрыторыі гораду Ваўчанск і ягоных ваколіцаў (у Харкаўскім і Чугуеўскім раёнах адпаведна).
Ваенкор Сямён Пегаў гаворыць, што каля Глыбокага ініцыятыва застаецца за Збройнымі сіламі Украіны, але пакуль ім не ўдаецца дасягнуць істотных поспехаў.
У гэты ж час у Ваўчанску расейцам удалося крыху палепшыць сваё пазіцыі, хоць агулам сітуацыя таксама застаецца амаль нязменнай.
Іншая прарасейская крыніца – тэлеграм-канал «Два майора» – піша, што штурмавыя групы войскаў РФ занялі адзін з будынкаў у раёне шматпавярховых дамоў і цяпер з баямі прасоўваюцца ў паўднёва-заходнім кірунку.
Адначасова з гэтым ідзе рух на паўднёвым захадзе ад самога гораду, дзе Узброеныя сілы РФ крыху расшырылі плацдарм на левым беразе ракі Воўча ў ваколіцах сяла Бугруватка.
У Генеральным штабе Збройных сілаў Украіны паведамілі, што на купянскім кірунку цягам апошніх содняў Сілы абароны краіны адбілі шэраг атак праціўніка ў ваколіцах населеных пунктаў Сынькоўка і Стэльмахаўка. Пры гэтым адзначаецца, што найбольш складаным участкам фронту застаюцца ваколіцы першага сяла, на якія прыходзіцца каля 80% атак.
У гэты ж час на суседнім ліманскім кірунку расейцы наступаюць каля сёлаў Грэкаўка, Макееўка, Неўскае і Церны.
Канал «Два майора» сцвярджае, што на ўсходзе ад Стэльмахаўкі УС РФ прасунуліся ўздоўж лесапаласы на глыбіню да 1,6 кіламетра.
Адначасова з гэтым, паводле крыніцы, адбыўся рух на ўсходзе ад Макееўкі ў бок самога сяла на адлегласць да 1,5 кіламетра.
Поспехі войскаў РФ на апошнім участку пацвярджаюць аналітыкі праекту Deepstate.
На сівэрскім выступе па фронце (з поўдня ад ракі Сівэрскі Данец) расейцы ціснуць у ваколіцах населеных пунктаў Івана-Дар’еўка, Выемка і Спірнае. Пры гэтым у апошнім населеным пункце ўжо ідуць баі. Прарасейскі тэлеграм-канал канал «Рыбарь» удакладняе, што сяло знаходзіцца пад агнявым кантролем войскаў РФ, паколькі апошнія кантралююць вышыні на паўднёвым усходзе ў ваколіцах трасы Т-13-02.
На краматорскім кірунку актыўнасць расейцаў засяроджаная ў ваколіцах Часавага Яру. У Міністэрстве абароны РФ заявілі пра поўны захоп часткі гораду, якая знаходзіцца на ўсходзе ад каналу Сівэрскі Данец – Данбас.
Гэтую інфармацыю пацвярджаюць у Deepstate, адзначаючы, што рашэнне пра адыход украінцаў за канал было цяжкім, але лагічным, паколькі ўсход гораду быў цалкам зруйнаваныя і аказаўся непрыдатным для далейшай абароны.
Камандзір тактычнай групы ЗСУ «Реванш» Багдан Хадаркоўскі гаворыць, што поспех даўся вялікай цаной для расейцаў, але цяпер яны маюць перспектывы для сур’ёзных аператыўных зменаў у Данецкай вобласці.
Акрамя гэта атакі на пазіцыі Сілаў абароны фіксуюцца каля сёлаў Калінаўка, Іванаўскае і Клішчыеўка.
Наступаюць войскі РФ і на тарэцкім кірунку ва ўсходніх ваколіцах аднайменнага гораду. Канал «Два майора» піша, што УС РФ развіваюць поспех у пасёлку Паўночнае.
Адначасова з гэтым фіксуюцца прасоўванні расейцаў з поўдня ад гораду каля сяла Нью-Ёрк.
Тэлеграм-канал «Сводки и Аналитика СВО» удакладняе, што рух адбыўся на вузкім участку на адлегласць да чатырох кіламетраў. Пры гэтым пад расейскі кантроль магло перайсці невялікае суседняе сяло Юр’еўка.
Праўкраінскі тэлеграм-канал «Говорять Снайпер» паведамляе, што расейцы ўжо замацоўваюцца ў гарадской забудове самога гораду Тарэцк.
На пакроўскім кірунку Узброеныя сілы РФ наступаюць з захаду ад раней занятага гораду Аўдзееўка.
Deepstate фіксуюць прасоўванні каля населенага пункту Прагрэс і ў сяле Карлаўка.
«Рыбарь» піша, што расейцы замацаваліся ў цэнтры сяла Сокал, а таксама часткова занялі буйны апорны пункт ЗСУ з поўначы ад населенага пункту.
Акрамя гэтага рух УС РФ назіраецца на паўночным захадзе ад Новапакроўскага.
Праўкраінскі тэлеграм-канал «Офіцер» мяркуе, што цяпер з усяго фронту найскладанейшая для ЗСУ сітуацыя назіраецца менавіта на пакроўскім кірунку.
Ніжэй па фронце – на суседнім курахаўскім кірунку – войскі РФ паступова выбіваюць праціўніка з Краснагораўкі.
Вайскоўцы 46-й брыгады ЗСУ гавораць, што неўзабаве расейцы выйдуць да паўночных ускрайкаў гораду, што ў перспектыве пагражае атачэннем вялікага ўчастку фронту з усходу ад лініі Карлаўка – Краснагораўка.
Таксама на кірунку працягваюцца баі каля сёлаў Канстанцінаўка і Парасковіеўка, але пакуль тут расейцы не маюць істотных поспехаў.
На паўднёвым участку фронту ў Данецкай вобласці, паводле Генштабу ЗСУ, Сілы абароны краіны адбілі атакі праціўніка каля сяла Валадымыраўка.
«Рыбарь» паведамляе пра баі на так званым урэмаўскім выступе, дзе цягам апошніх содняў войскі РФ прасунуліся з поўначы ад сяла Старамаёрскае ў бок суседняй Макараўкі на адлегласць не меншую за 700 метраў.
У Запарожскай вобласці баявыя дзеянні па-ранейшаму лакалізуюцца ў ваколіцах гораду Арэхаў, але істотных зменаў лініі сутыкнення не назіраецца.
У Херсонскай вобласці расейцы прынамсі чатыры разы безвынікова атакавалі пазіцыі Збройных сілаў у рэчышчы Дняпра.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
