Цікава, колькі зборнай Англіі будзе так шанцаваць?
Англія вельмі блякла правяла групавы турнір і выйшла ў плэй-оф толькі з дзесяццю ўдарамі ў створ брамы і двума галамі. У 1/8 фіналу Англія зноў гуляла дрэнна, але змагла выратавацца ў матчы са Славаччынай, зраўняўшы лік на апошняй хвіліне гульні. Тая ж гісторыя паўтарылася ў 1/4 фіналу. Цікава, колькі зборнай Англіі будзе так шанцаваць?
Далей зборная Англіі згуляе са зборнаю Нідэрландаў, што атрымала валявую перамогу над Турэччынай. Болей у нашым аглядзе.
Англія – Швейцарыя 1:1, пенальці 5:3.
Гульня Англіі далёкая ад ідэалу. Яна прывезла на турнір вялікую абойму форвардаў, толькі квартэт Бэлінгэм, Кейн, Сака і Фоўдэн за сезон забіў 111 галоў. А вось у чатырох гульнях «Еўра» – толькі чатыры: двойчы адзначыліся Кейн і Бэлінгэм. Апошні мог атрымаць дыскваліфікацыю за непрыстойны жэст у гульні са Славаччынай, але абышлося штрафам памерам 20 тысяч еўраў.
Швейцарыя выглядала на гэтым «Еўра» даволі ўпэўнена. Яна здабыла дзве перамогі, двойчы згуляла ўнічыю і выбіла дзейнага чэмпіёна, Італію. Звернем увагу, што Англія выгуляла пяць апошніх матчаў са Швейцарыяй. Варта звярнуць увагу, што пяць гадоў таму каманды сустрэліся ў гульні за 3-е месца ў турніры Лігі нацыяў, тады асноўны і дадатковы час скончыўся мірам 0:0, а ў пенальці перамаглі англічане – 5:4. Цяпер мы бачым, што Англіі пашанцавала зноў. Другі раз у сваёй гісторыі Швейцарыя дабралася да 1/4 фіналу «Еўра», на «Еўра-2020» у 1/4 швейцарцы саступілі ў серыі пенальці Іспаніі. Англія на тым турніры змагла дайсці да фіналу, дзе саступіла Італіі.
Першы тайм гульні паміж Англіяй і Швейцарыяй на «Еўра-2024» быў зусім не відовішчным, каманды змагаліся за ініцыятыву, але за ўвесь тайм не стварылі ніводнага моманту і ні разу не трапілі ў створ брамы.
Швейцарыя на 75-й хвіліне выйшла наперад, калі Брэль Амбалё замкнуў дальнюю штангу.
Трэнерскі штаб Англіі зрабіў тры замены, і праз пяць хвілінаў лік у гульні быў роўны, Сака ўдарам з-за межаў штрафной забіў свой першы гол на «Еўра-2024» і перавёў гульню ў оўвэртайм. Англія змагла ўратаваць сябе ў другой гульні плэй-оф запар. Цікава, што ўдар Сакі быў першым, які трапіў у створ брамы. У 1/8 фіналу са Славаччынай у створ брамы першы ўдар прыйшоўся на 95-ую хвіліну і таксама зрабіўся галявым.
Дадатковыя паўгадзіны лепей правялі швейцарцы, некалькі разоў Англію выратаваў брамнік Пікфард, аднойчы – крыжавіна. Але пазбегчы серыі пенальці ўсё ж не ўдалося, і ў іх больш пашчасціла Англіі. Гэтак Швейцарыя другі раз у сваёй гісторыі страціла шанец згуляць у паўфінале.
Нідэрланды – Турэччына 2:1.
У 1988 годзе фінальны турнір чэмпіянату Еўропы таксама прымала Нямеччына, тады ў спаборніцтвах бралі ўдзел толькі восем камандаў. І таму пасля групавога турніру гулялі паўфіналы. У іх Нідэрланды перамаглі гаспадароў 2:1. Немцы тады адкрылі лік, а зраўняў яго сённяшні галоўны трэнер зборнай Нідэрландаў Роналд Куман. Потым галандцы абгулялі ў фінале СССР і зрабіліся чэмпіёнамі Еўропы. Пасля гэтага Нідэрланды трафеяў не бралі і чатыры разы заваявалі бронзу чэмпіянату Еўропы ды аднойчы – свету.
Турэччыны ніхто не ўспрымаў усурʼёз, але каманда італьянскага трэнера Вінчэнца Мантэллі атрымала тры перамогі, перагуляла грузінаў, адправіла дадому чэхаў і аўстрыйцаў. Пры гэтым туркі забілі ажно сем галоў.
Найлепшы «Еўра» ў гісторыі Турцыі – 2008 года, калі яны дайшлі да паўфіналу, дзе саступілі немцам.
Ужо на першай хвіліне гульні мог забіць Дэпай, але мяч пайшоў вышэй брамы. Далей перавага ў матчы была на баку Нідэрландаў, пакуль за дзесяць хвілінаў да канца першага тайму Турэччына не адкрыла лік у гульні. 19-гадовы Арда Гюлер з мадрыдскага «Рэалу» падаў у штрафную, а абаронца Самэт Акайдын ударам галавой паклаў мяч у браму.
Нідэрланды перабудавалі свой склад і пайшлі ратаваць гульню, але ледзь не прапусцілі другога голу: Гюлер прабіў штрафны з 26 метраў і ўдарыў у штангу.
У сярэдзіне другога тайму Нідэрланды ўсё ж зраўнялі лік. Дэпай падаў, а Стэфан дэ Врэй прабіў галавой моцна і дакладна. А на 76-й хвіліне галандцы выйшлі наперад, мяч ва ўласную браму зрэзаў Мэрт Мюльдур. Гэта дзясяты аўтагол на гэтым «Еўра», і да рэкорду мінулага турніру застаўся толькі адзін такі мяч. У выніку Турэччына арганізавала фінальны штурм, але ўратаваць гульні не змагла.
А далей усё проста: 9 ліпеня а 22:00 паўфінал Іспанія – Францыя. 10 ліпеня, таксама а 22:00, другі паўфінал, Англія – Нідэрланды. 14 ліпеня – фінал.
Алесь Ляўчук belsat.eu
