Яны пратрымаліся каля года. Улады ўсіх раёнаў закрылі чаты адначасова.
Чаты «дыялогу з уладай» для жыхароў Гомельскай вобласці ў Telegram і Viber перасталі працаваць. Яны пратрымаліся каля года. Улады ўсіх раёнаў закрылі чаты адначасова, заўважыў «Флагшток».
У гэтых чатах людзі скардзіліся на надзённыя праблемы: публікавалі фота разбітых дарог, паведамлялі аб бруднай вадзе ў кранах.
Чыноўнікі заявілі, што ўдасканальваюць працу з насельніцтвам і прапаноўваюць людзям пісаць у чат-боты. Гэта значыць, убачыць, ці шмат людзей сутыкнулася з такой жа праблемай, немагчыма.
Раней улады выхваляліся, што прыдумалі сучасны спосаб зносінаў з людзьмі. Жлобінскі райвыканкам 1 ліпеня 2023 года паведамляў:
«З мэтай своечасовага рэагавання на пытанні, якія тычацца жыццядзейнасці жыхароў Жлобінскага раёну, у сацыяльнай сетцы Viber створаная супольнасць “Жлобин. Диалог с властью”. Далучайцеся і будзьце ў курсе змяненняў, дзякуючы своечасоваму рэагаванню на праблемы і пытанні, якія хвалююць жлобінцаў. Мэта: даць дадатковую магчымасць наўпроставага кантакту з органамі мясцовай улады ў любых пытаннях жыццядзейнасці ў раёне».
Арсен Рудэнка belsat.eu
