Ад хаты на ўскраіне Шклова да раскошных сядзібаў каля Драздоў – і гэта толькі афіцыйна.
Аляксандр Лукашэнка заяўляе, што 30 гадоў змагаецца з карупцыяй. Ды тая яго перамагае: клан Лукашэнкаў ператварыў Беларусь ва ўласны бізнес. Сам Лукашэнка фактычна мае не менш як 18 рэзідэнцыяў, а мо ўжо і 19, але паводле дакументаў не валодае ніякаю маёмасцю. «Белсат» атрымаў ад «BELPOL» звесткі пра маёмасць іншых чальцоў клану.
Афіцыйна Аляксандр Лукашэнка не мае ніякай маёмасці. Перад выбарамі-2020 ён не задэклараваў кватэраў, дамоў, зямельных надзелаў ці гаражоў, а таксама доляў у статутных фондах юрыдычных асобаў. Задэклараваў толькі даход Br 117 068 за 2019 год – на той час гэта каля $ 56 тысячаў.
У матэрыялах, якія арганізацыя «BELPOL» перадала «Белсату», таксама не знайшлося маёмасці, запісанай на Лукашэнку, ягоных дзяцей і шэраг іншых чальцоў клану. Большасць рэзідэнцыяў фармальна наагул не звязаная з Лукашэнкам: вунь палац з «душам уражанняў» – гэта ж «Фонд першага», участак у Сочы – у нейкай фірмы-аднадзёнкі, рэзідэнцыя «Усход» на Менскім моры – там зусім заблытаная схема з «Dana Holding» і кіпрскімі афшорамі…
Але пра афіцыйную маёмасць некаторых з «вялікай сям’і» звесткі знайшліся.
Аляксандр Лукашэнка фармальна прапісаны ў Менску, праезд Дразды 1. Гэта адна з афіцыйных рэзідэнцыяў Лукашэнкі. Ды пра тое, каб ён там з’яўляўся, даўно не было навінаў, хоць вызваленне Драздоў каштавала дорага.
У пачатку 1990-х у жыллёвым комплексе ў Драздах суседнічалі рэзідэнцыі замежных дыпламатаў і рэзідэнцыя Лукашэнкі. Як прызнаваўся сам Лукашэнка, размяшчэнне падраздзялення марскіх пяхотнікаў ЗША, якія вартавалі амерыканскіх дыпламатаў, за 50 метраў ад ягонай асабістай рэзідэнцыі цалкам выключаецца. Увесну 1998-га ўлады паведамілі амбасадарам, што ім трэба пакінуць Дразды, бо жыллёвы комплекс нібыта патрабуе «капітальнай рэканструкцыі». Дыпламаты адмовіліся, але ў выніку канфлікту амбасады 22 краінаў усё ж былі выселеныя і пакінулі Беларусь, у адказ на гэта ўезд у ЗША і Еўразвяз забаранілі больш як 130 беларускім чыноўнікам, у тым ліку і Лукашэнку. У пачатку 1999 года канфлікт быў урэгуляваны на аснове пэўнага кампрамісу. Афіцыйны Менск дэ-факта прызнаў парушэнні і пагадзіўся выплаціць кампенсацыю.
У тым жа будынку на адрас праезд Дразды 1 прапісаныя ягоныя дзеці Віктар, Дзмітрый і Мікалай Лукашэнкі; жонка Віктара Лілія Лукашэнка; дзеці Віктара Яраслаў, Валерыя, Аляксандр і Вікторыя Лукашэнкі; жонка Дзмітрыя Ганна Лукашэнка (вядомая пад псеўданімам Ганна Сялук); дачкі Дзмітрыя Настасся, Дар’я і Аляксандра Лукашэнкі.
Мяркуецца, што Аляксандр Лукашэнка жыве ў палацы ў рэзідэнцыі «Азёрны», што ў Астрашыцкім Гарадку. Рэзідэнцыю ідэнтыфікавалі як маёнтак XIX стагоддзя, пабудаваны графамі Тышкевічамі. Афіцыйна гэта не пацверджана, але Лукашэнка рэгулярна сустракае там гасцей, як удома. Паблізу, дарэчы, месціцца Рэспубліканскі медычны цэнтр Кіраўніцтва справамі Лукашэнкі.
Ніякай маёмасці, запісанай на дзяцей і ўнукаў Лукашэнкі, не знайшлося. Але ёсць маёмасць у Шклоўскім раёне Магілёўскай вобласці, запісаная на фармальную жонку Аляксандра Лукашэнкі – Галіну, з якой ён не жыве з 1994 года. На ёй два аднапавярховыя драўляныя жылыя дамы: адзін дом плошчаю 54 м² у вёсцы Вялікі Межнік каля Александрыі з надзелам 0,2078 га (у гэтым доме яна прапісаная) і яшчэ адзін дом плошчаю 196,4 м² у Шклове з надзелам у 0,1498 га.
Таксама знайшлася маёмасць, запісаная на Ірыну Абельскую – адну з меркаваных палюбоўніц Аляксандра Лукашэнкі і меркаваную маці Мікалая. «BELPOL», дарэчы, знайшоў у дакументах запісанага на Ірыну Абельскую сына Мікалая Аляксандравіча Абельскага, які нарадзіўся 31 жніўня 2004 года. Грамадзяніна Беларусі з такімі ж звесткамі няма, але імя, імя па бацьку і дата нараджэння супадаюць з такімі ў Мікалая Лукашэнкі.
Абельская валодае жылым домам плошчаю 348,3 м² у менскім раёне Вясёлкавым (побач з вадасховішчам Дразды) і ўчасткам плошчаю 0,15 га. Там жа і прапісаная разам з сынам Дзмітрыем Абельскім – афтальмолагам, тыктокерам і меркаваным зводным братам Мікалая. Дзмітрый валодае таксама 4-пакаёваю кватэраю плошчаю 125,9 м² (плюс машынамесца каля дому) побач, каля комплексу «Arena City», і недабудаваным закансерваваным домам у вёсцы Воўкавічы каля Шчомысліцы ў Менскім раёне з надзелам плошчаю 0,1509 га.
Жонка сярэдняга сына Лукашэнкі – Ганна Лукашэнка (яна ж Сялук) – валодае двухпавярховым домам плошчаю 132 м² недалёка ад цэнтру Шклова і надзелам 0,0706 га каля таго дому. Ейная сястра Таццяна Кулакова валодае дзвюма кватэрамі (дакладней, часткамі невялікіх дамоў): 3-пакаёвай плошчаю 126,6 м² у менскім Лебядзіным і 2-пакаёвай плошчаю 125,4 м² на ўскраіне Менску, дзе раней была вёска Малое Сціклева (у другой прапісаны ейны муж, які нерухомасці не мае). Да першай кватэры яна мае ўчастак на 0,1215 га, да другой – 0,15 га.
Знайшлася таксама маёмасць у Іны Гарусавай, сястры Ліліі Лукашэнкі, жонкі Віктара Лукашэнкі, якая разам з імі і мужам лятала на курорты. У яе ўсяго толькі 1-пакаёвая кватэра, але плошчаю 110,4 м² у комплексе «Маяк Менску». У ейнага мужа Аляксандра Гарусава – ужо 3-пакаёвая кватэра, але плошчаю толькі 77,4 м² і на ўскраіне Менску – у Каменнай Горцы. Таксама на яго запісаны ўчастак на 0,1378 га ў садовым таварыстве «Крылова-2012» каля Пятрышак у Менскім раёне. А на іхнага сына Кірыла Гарусава запісаная 1-пакаёвая кватэра плошчаю 75,8 м² у тым жа «Маяку Менску» (прапісаны ён у бацькі ў Каменнай Горцы). Маці Ліліі ж не мае нерухомасці, а прапісаная яна ў прыватным доме на ўскраіне Шклова.
Любоў Аляксандра Лукашэнкі да раскошных і дарагіх аўтаў – не сакрэт. Але афіцыйна на яго не запісаны ніводзін аўтамабіль: ані «Tesla», ані «Maybach».
На Віктара Лукашэнку запісалі матацыкл «Harley-Davidson», на ягоную жонку Лілію – люксавы пазадарожнік «Range Rover», абодва маюць у нумарах камбінацыю лічбаў «0007».
На мужа сястры Ліліі, Аляксандра Гарусава, запісаны кросоўвэр «Volvo XC90», на ягонага сына Кірыла – кросоўвэр «Audi Q7».
А Уладзімір Кулакоў, муж сястры жонкі Дзмітрыя Лукашэнкі, мае сціплы мікрааўтобус «Volkswagen Crafter».
Найбольш цікавага ў матэрыялах «BELPOL» знайшлося пра машыны Ірыны Абельскай і ейнага «афіцыйнага» сына.
Меркаваная маці Мікалая Лукашэнкі карысталася «Volkswagen Passat», кросоўвэрамі «Suzuki Grand Vitara», «Volkswagen Tiguan», «Volvo XC60» і «Volvo XC70», прычым некаторымі – не па адной машыне, бо мяняліся нумары кодаўбаў. А нумары дзяржаўнай рэгістрацыі – усе «крутыя», з лічбамі «7777» ці «8888». На Ірыну Абельскую знайшлі запісы пра 43 парушэнні правілаў дарожнага руху, пераважна – перавышэнне хуткасці.
Ейны сын Дзмітрый, меркаваны зводны брат Мікалая Лукашэнкі, часткова выкарыстоўваў машыны маці, але меў і свае: «Honda Civic», «Mazda 626», «Dodge Stratus», «Audi Allroad», прынамсі два «Volkswagen Passat», а таксама люксавы «Mercedes-Benz S430». Ездзіць ён крыху акуратней за маці: на яго знайшлі запісы пра 30 парушэнняў.
Аляксандру Лукашэнку дарылі нямала зброі: толькі колішні міністр абароны Беларусі Андрэй Раўкоў афіцыйна надарыў яму аўтамат Калашнікава, пісталет «Mauser K96», пісталет «ТТ» і яшчэ адзін невядомы пісталет (паказалі адно скрынку з выразам пад штосьці падобнае да «Walther PPK»). Вядома таксама, што Мікалай Лукашэнка мае залаты пісталет ад экс-прэзідэнта Расеі Дзмітрыя Мядзведзева.
Аляксандр і Мікалай у 2020 годзе хадзілі вакол Палацу незалежнасці з аўтаматамі Калашнікава, прычым Аляксандр размахваў аўтаматам без ражка.
З матэрыялаў «BELPOL» вынікае, што меркаваны зводны брат Мікалая, Дзмітрый Абельскі, таксама любіць зброю: валодае стрэльбамі «Сайга-9», «MP-153» і «Beretta».
Алесь Наваборскі belsat.eu
