Яна прапанавала навучаць у Беларусі больш зімбабвійскіх лекараў.
Першая лэдзі Зімбабвэ, жонка прэзідэнта гэтай краіны Аксілья Мнангагўа, якая цяпер знаходзіцца з візітам у Беларусі, сустрэлася з міністрам аховы здароўя нашай краіны Аляксандрам Хаджаевым, а таксама з маці Мікалая Лукашэнкі Ірынай Абельскай. Пра гэта Мнангагўа паведаміла ў сваім акаўнце ў Х.
Падчас сустрэчы жонка прэзідэнта Зімбабвэ распавяла пра выкарыстанне мабільнай клінікі, якую Абельская прывезла ў афрыканскую краіну ў студзені 2024 года, а таксама пра поспехі лекараў, якія вучыліся ў Беларусі.
Паводле першай лэдзі афрыканскай краіны, міністр аховы здароўя Беларусі «быў рады даведацца, што каманда лекараў наведала многія аддаленыя раёны Зімбабвэ ў рамках складанай інфармацыйнай праграмы, накіраванай на забеспячэнне здароўя людзей, што жывуць у маргіналізаваных супольнасцях».
Аксілья Мнангагўа прапанавала пашырыць праграму навучання лекараў з Зімбабвэ, а таксама разгледзець інвестыцыі ў фармацэўтычны сектар сваёй краіны.
«Як амбасадарка па пытаннях аховы здароўя я скарысталася гэтай магчымасцю, каб прапанаваць Беларусі навучаць больш лекараў і разгледзець магчымасць інвестыцыяў у зімбабвійскі фармацэўтычны сектар, каб павялічыць попыт на лекі ў Зімабвэ. Улічваючы цэнтральнае знаходжанне нашай краіны, гэта можа прынесці карысць і іншым краінам SADC», – распавяла першая лэдзі.
10 ліпеня Аксілья Мнангагўа сустрэлася з Аляксандрам Лукашэнкам. Разам з першай лэдзі ў Беларусь прыехалі прадстаўніцы жаночай грамадскай арганізацыі Зімбабвэ з розных галінаў дзейнасці – горназдабыўчай, сельскагаспадарчай, банкаўскага сектару, інфармацыйнага і турыстычнага кірункаў.
Аксілья падзякавала Лукашэнку за падтрымку Зімбабвэ і асабіста кіраўніку краіну Эмэрсану Мнангагўэ.
,,«Нашая краіна таксама знаходзіцца пад санкцыямі, менавіта таму мы асабліва высока цэнім тую падтрымку, якую вы нам аказваеце», – сказала першая лэдзі.
Аксілья Мнангагўа прыязджала ў Беларусь у красавіку 2023 года.
У студзені 2024 года Лукашэнка падараваў Зімбабвэ высокатэхналагічную мабільную клініку. На цырымоніі перадачы прысутнічалі прэзідэнт Зімбабвэ Эмэрсан Мнангагўа і Ірына Абельская.
Афіцыйнае тавараабарачэнне Беларусі і Зімбабвэ ў 2022 годзе склала ўсяго каля 40 мільёнаў долараў. Аднак у Лукашэнкі асаблівыя інтарэсы ў гэтай краіне. Кампанія «Zim Goldfields» займаецца там золатаздабычаю. У 2021 годзе беларускія журналісты высветлілі, што долямі «Zim Goldfields» праз фірмы-пракладкі валодаюць Сяргей Шэйман, сын даўняга паплечніка Лукашэнкі Віктара Шэймана, а таксама бізнесмен Аляксандр Зінгман.
Рэжым Лукашэнкі актыўна шукае партнёраў на глабальным Поўдні. У чэрвені 2024 года Беларусь усталявала дыпламатычныя стасункі з Каралеўствам Эсватыні. 20 чэрвеня ў Менск прыляцеў прэм’ер-міністр каралеўства Эсватыні Расэл Дламіні.
Марыя Міхалевіч belsat.eu
