«Дні Грунвальду 2024» доўжацца ажно пяць дзён – з 10 да 14 ліпеня.
У вёсцы Грунвальд, што ў Вармінска-Мазурскім ваяводстве на поўначы Польшчы, адбылася рэканструкцыя бітвы 1410 года паміж аб’яднаным войскам Кароны Польскай і Вялікага Княства Літоўскага з аднаго боку і Тэўтонскім ордэнам ды ягонымі саюзнікамі – з другога.
«Дні Грунвальду 2024» доўжацца з 10 да 14 ліпеня. У праграме – спаборніцтвы лучнікаў, двубоі на мячах, сярэднявечныя футбол і шахматы, конкурсы напояў, грыгарыянскія спевы, танцы і паказы моды рыцарскіх часоў, сакалінае паляванне ды іншае.
Але галоўныя падзеі адбыліся ў суботу, 13 ліпеня, калі была зладжаная інсцэнізацыя той самай Грунвальдскай бітвы – ужо ў 26-ы раз. Сёлета ў ёй бяруць удзел больш як 1300 рэканструктараў з усяго свету.
На інсцэнізацыю бітвы і гістарычны фэст з яе нагоды з’ехаліся дзясяткі тысячаў гасцёў з усёй Еўропы: ад Харватыі да Нарвегіі. І пры гэтым усё абышлося без аўтазакаў і турнікетаў, без якіх не праходзіць аніводнае святкаванне ў Беларусі. Як выяўляецца, публічныя падзеі можна праводзіць і без натоўпаў міліцыянтаў, і армагедону без гэтага не здараецца.
Бітва пад Грунвальдам адбылася 15 ліпеня 1410 года падчас Вялікай вайны паміж Каронай Польскай і Вялікім Княствам Літоўскім з аднаго боку і Тэўтонскім ордэнам – з другога. У адной з найвялікшых бітваў сярэднявечнай Еўропы сутыкнуліся, паводле розных ацэнак, ад 27 да 66 тысячаў чалавек. Апроч польскага войска караля Ягайлы і вялікалітоўскага князя Вітаўта супраць крыжакоў біліся таксама іх васалы і найміты з Малдовы, Чэхіі і татары будучага залатаардынскага хана Джэлала ад-Дына. Нямецкіх крыжакоў жа, апроч падкантрольных ім земляў у сучаснай Польшчы і Балтыі, падтрымлівалі таксама шматлікія заходнееўрапейскія рыцары, у тым ліку з Англіі, Францыі, Люксембургу, Вугоршчыны.
Бітва скончылася разгромам Тэўтонскага войска і гібеллю вялікага магістра Ульрыха фон Юнгінгена. Пры гэтым адну з вызначальных роляў згуляла мужнасць трох русінскіх палкоў з Воршы, Мсціслава і Смаленску.
Але ўзяць сталіцу ордэну – Марыенбург (Мальбарк) – саюзнае войска пасля бітвы не здолела. Паводле міру 1411 года, ордэн адмовіўся ад сваіх прэтэнзіяў на Жамойць на карысць ВКЛ і перадаў частку сваіх земляў Кароне Польскай.
belsat.eu
