На «Новай Беларусі» раскажуць пра кадравыя змены ў Кабінеце і абмяркуюць стратэгію-2025.
Аб’яднаны пераходны кабінет 15 ліпеня сабраўся на паседжанне ў Варшаве. Перад паседжаннем чальцы Кабінету расказалі журналістам пра «Платформу 2025» і планы на канферэнцыю «Новая Беларусь».
Абраная прэзідэнтка Беларусі Святлана Ціханоўская на адкрыцці паседжання расказала, што прыехала ў Варшаву з фестывалю «Тутака». Падчас фэсту і далей з візітам у Польшчы яна плануе сустрэцца з беларусамі, падляскай беларускай меншасцю, дзеячамі культуры, беларускімі бізнесоўцамі, мясцовымі ўладамі і дыпламатамі, якія працуюць з Беларуссю.
У Варшаве Ціханоўская плануе сустрэцца з былымі палітычнымі зняволенымі, ініцыятывамі гуманітарнай дапамогі ўцекачам, а таксама прадстаўнікамі Міністэрства ўнутраных справаў Польшчы. З міністэрствам працягвае працу група ў пытаннях легалізацыі беларусаў у Польшчы. Таксама Ціханоўская будзе працаваць над пытаннем вызвалення палітвязняў, асабліва тых, якія маюць крытычны стан здароўя. Сярод іншага Ціханоўская адзначыла, што Кабінет будзе абмяркоўваць падтрыманне медыяў і, у прыватнасці, «Белсату».
Як заўважыў намеснік Ціханоўскай у Кабінеце, лідар Народнага антыкрызіснага ўпраўлення Павел Латушка, для беларусаў у выгнанні важнае падтрыманне Польшчы – каб яны маглі жыць і працаваць у Польшчы, уладкоўваць справы легалізацыі. Паводле Латушкі, у Польшчы цяпер каля 300 тысяч беларусаў, гэта другая паводле колькасці меншасць пасля ўкраінцаў. Для дэмакратычных сілаў важныя таксама тэмы беларуска-польскай мяжы. Латушка падкрэсліў тэму адрознення рэжыму Аляксандра Лукашэнкі, які стварыў міграцыйны крызіс і падтрымлівае Расею ў вайне ва Украіне, ад беларусаў, якія яму супрацьстаяць і не мусяць цярпець ад санкцыяў за дзеянні Лукашэнкі.
Паседжанне Кабінету прайшло ў Музеі вольнай Беларусі ў закрытым фармаце, журналістаў пусцілі толькі на ўступныя прамовы. Таксама перад пачаткам паседжання прадстаўнікі Кабінету давалі каментары для прэсы.
Ціханоўская сустрэлася з Кабінетам, каб абмеркаваць стратэгію на 2025 год і падрыхтаваць канферэнцыю «Новая Беларусь», запланаваную на 3–4 жніўня ў Вільні.
Латушка расказаў, што ў 2025 годзе Аляксандр Лукашэнка плануе абвясціць прэзідэнцкія выбары – «так званыя выбары», бо Лукашэнка не мае права абвяшчаць новых выбараў пасля прайграных выбараў у 2020-м. Але раз Лукашэнка функцыйна кантралюе тэрыторыю Беларусі, дэмакратычныя сілы мусяць выпрацаваць сваю стратэгію на ягоныя «выбары».
На канферэнцыі, чакае Латушка, будзе прынятая палітычная дэкларацыя, а таксама дэкларацыя «Платформы 2025» наконт супрацы і функцыянавання, прынцыпаў дзеяння дэмакратычных сілаў Беларусі. Пакуль ухваленай «Платформы 2025» няма, ёсць толькі папярэднія праекты.
На канферэнцыі «Новая Беларусь», паводле Латушкі, будуць размаўляць пра кадравыя змены ў Аб’яднаным пераходным кабінеце і пра супрацу з новым складам Каардынацыйнай рады.
,,«Плануецца, што падчас гэтай канферэнцыі будзе абвешчанае ўзмацненне Аб’яднанага пераходнага кабінету, – сказаў Латушка пра канферэнцыю «Новая Беларусь». – Я думаю, што адбудуцца таксама некаторыя кадравыя змены ў Аб’яднаным пераходным кабінеце».
Цяпер АПК мае чацвярых прадстаўнікоў і аднаго выканаўцу абавязкаў прадстаўніка. Акрамя Латушкі, які адказвае за транзіт улады, у Кабінеце цяпер ёсць прадстаўнік у справе абароны і нацыянальнай бяспекі Валер Сахашчык, прадстаўніца ў справе нацыянальнага адраджэння Аліна Коўшык, прадстаўніца ў сацыяльных пытаннях Вольга Гарбунова.
У чэрвені Кабінет пакінуў прадстаўнік у замежных справах Валер Кавалеўскі (з ім з прадстаўніцтва пры Кабінеце пайшлі яшчэ дзве асобы), ягоныя абавязкі выконвае Уладзімір Астапенка. Вакантныя пасады прадстаўніка ў справе правапарадку (Аляксандра Азарава звольнілі ў мінулым жніўні) і прадстаўніка ў эканоміцы (Таццяна Зарэцкая пакінула Кабінет у лістападзе 2022 года).
У новы склад Каардынацыйнай рады прайшлі два прадстаўнікі Аб’яднанага пераходнага кабінету (Павел Латушка і Аліна Коўшык), найбольшы блок – блок Латушкі і руху «За свабоду», ад якога была выбраная спікерка. Гучаць галасы, што КР становіцца прыдаткам АПК.
Латушка на гэткае апісанне адказаў: варта прайсці «лікбез» парламентарызму: калі паглядзець на еўрапейскі парламентарызм, дык там парламенцкую бальшыню, кіраўнічую кааліцыю, фармуе ўрад. Праз гэта, падкрэслівае Латушка, забяспечваецца аператыўная і эфектыўная праца заканадаўчай і выканаўчай улады.
Ён таксама адзначыў, што ягоны блок у КР мае толькі 28 галасоў з 80, не мае абсалютнай бальшыні, каб прымаць пастановы самастойна. Кожная фракцыя можа фармаваць бальшыню дзеля ўхвалення прапановаў, якія лічыць важнымі.
,,«Каардынацыйная рада можа прымаць стратэгічныя пастановы наконт дзейнасці дэмакратычных сілаў і развіцця дэмакратычнага руху адносна тых дэмакратычных інстытутаў, структураў, ініцыятываў, якія гатовыя падтрымліваць агульнадэмакратычны рух, які на сённяшні дзень рэпрэзентаваны трыма інстытутамі: Каардынацыйнай радай, Аб’яднаным пераходным кабінетам і абранай прэзідэнткай».
Латушка дадаў, што выступае за ўзмацненне ўсіх трох гэтых інстытутаў. І адзначыў, што Каардынацыйная рада ўжо мае магчымасці супрацы з прынамсі 24 замежнымі парламентамі, бо ў парламентах 24 краінаў дзейнічаюць групы «сяброў Беларусі». Таксама цяпер фармуецца дэлегацыя дэмакратычнай Беларусі ў Парламенцкую асамблею Рады Еўропы, развіваецца супраца з Еўрапарламентам і Парламенцкай асамблеяй Арганізацыі бяспекі і супрацы ў Еўропе.
Акрамя таго, Латушка нагадаў, што 80 дэлегатаў КР жывуць у мностве розных краінаў – і могуць рэпрэзентаваць інтарэсы дэмакратычнага руху ў краінах, дзе жывуць.
«Няма ніякіх абмежаванняў, перашкодаў для таго, каб яны дапамагалі ў дзейнасці Аб’яднанага пераходнага кабінету і абранай прэзідэнткі, – сказаў Латушка пра дэлегатаў КР. – Нам не хапае чалавечых рэсурсаў, а гэта велічэзны дадатковы рэсурс, які нам важна аб’яднаць і выкарыстоўваць для галоўнай мэты: зменаў у Беларусі».
Алесь Наваборскі belsat.eu
