У фінале з лікам 2:1 іспанцы перамаглі англічанаў.
У Нямеччыне 14 ліпеня скончыўся чэмпіянат Еўропы па футболе, яго пераможцай заслужана стала зборная Іспаніі, якая на турніры выгуляла ўсе сем гульняў. У фінале з лікам 2:1 іспанцы перамаглі англічанаў. Праз 12 гадоў іспанцы зноў найлепшыя на кантыненце і першыя, хто змог узяць гэты трафей чатыры разы. Англія ж прайграла другі фінал запар. Болей – у нашым аглядзе.
У фіналах топ-турніраў іспанцаў не было 12 гадоў, з таго часу, калі яны цягам шасці гадоў выгулялі два чэмпіянаты Еўропы (да гэтага нікому не ўдавалася перамагчы на «Еўра» двойчы запар) і адзін чэмпіянат свету. Нагадаем, што ў 2012 годзе Іспанія разбіла Італію з лікам 4:0.
На «Еўра-2020» Іспанія вярнулася ў элітны клуб і дабралася да паўфіналу, дзе ў серыі пенальці саступіла будучаму чэмпіёну – Італіі. Асноўны час той гульні скончыўся з лікам 1:1. Лік у гульні тады зраўняў Альвара Марата, які забіў ужо і на гэтым турніры. На рахунку форварда «Атлетыка» адзін мяч. Цікава, што Марата забівае галы на чацвёртым топ-турніры запар, ён з сямю мячамі стаў найлепшым бамбардзірам зборнай Іспаніі на фінальных турнірах чэмпіянату Еўропы. Пры гэтым форварду толькі 31 год. У чэмпіянаце Іспаніі і Італіі ён забівае не меней за дзевяць галоў за сезон пяць сезонаў запар. Напрыклад, у гэтым сезоне Марата забіў пятнаццаць мячоў. Стала вядома, што пасля «Еўра» Марата стане гульцом «Мілану», ён падпіша кантракт да 2028 года і заменіць у складзе «Мілану» француза Алівіе Жыру, які перабіраецца за акіян і будзе абараняць колеры «Лос-Анджэлес Гэлаксі». Нагадаем, што на гэтым «Еўра» найлепшы бамбардзір у гісторыі зборнай Францыі (57 галоў) нічога не забіў.
Сапраўдным героем Іспаніі пад час плэй-оф стаў 26-гадовы Даньель Ольма, якія забіў у кожнай гульні на вызначальнай стадыі – ён адзін з найлепшых бамбардзіраў «Еўра». Столькі ж галоў – у англічаніна Кейна. Іспанія перамагла ва ўсіх шасці гульнях на гэтым «Еўра». А вось Англія з цяжкасцю выйшла з групы, потым цудам выратавалася ў гульні 1/8 фіналу супраць Славаччыны, потым гэткая ж гісторыя ў гульні са Швейцарыяй, якую англічане перамаглі ў серыі пенальці. Нарэшце, у паўфінале Англія паказала сваю пакуль найлепшую гульню і перамагла Нідэрланды – 2:1.
Падчас турніру шмат крытыкі вылілася ў бок зборнай Англіі і яе галоўнага трэнера Герэта Саўтгейта. Але раптам усё змянілася і стала вядома, што трэнер будзе працаваць з Англіяй мінімум яшчэ адзін цыкл і рыхтаваць яе да чэмпіянату свету – 2026.
,,– Я казаў перад пачаткам «Еўра», што або Англія, або Францыя дойдуць да фіналу. Хаця шмат хто казаў, што Англія не выйдзе з групы з такой гульнёй, але ціхай сапай зборная Англіі пад кіраўніцтвам Герэта Саўтгейта другі раз запар дабралася да фіналу «Еўра». Усё проста – гэтая такая ягоная методыка, ён вельмі шмат працуе ў гэтым напрамку. Бо раней англічане гулялі ў адкрыты футбол заўсёды і ў плане выніку ў іх нічога не атрымлівалася.Калі яны траплялі на добрую прагматычную праграму, яны прайгравалі. Але ў іх заўжды быў добры склад. Гэта ягонае трэнерскае крэда. І як вынік – два фіналы «Еўра» і плэй-оф чэмпіянату свету. Гэта добры вынік, – кажа наш эксперт, былы футбаліст, а цяпер трэнер Яўген Вяроўка.
Журналіст, эксперт у іспанскім футболе Юрый Доўнар распавёў падкантрольным дзяржаве спартовым СМІ з Беларусі пра галоўнага трэнера зборнай Іспаніі.
,,– Перад стартам «Еўра-2024» зборная Іспаніі ў рэйтынгу прэтэндэнтаў на перамогу была пятай-шостай, але за некалькі тыдняў перавярнула нашую свядомасць. Ужо пасля групавога этапу стала зразумела – прыгажэйшага на гэтым турніры нікога няма. Пасля перамогі над немцамі ў чвэрцьфінале адчуванні ператварыліся ў сцвярджэнне: калі «Чырвоная фурыя» не стане пераможцай, здарыцца вялікая несправядлівасць. Як ім удалося прайсці такі шлях, ды яшчэ так хутка?
Іспанскага рулявога абвінавачвалі ў тым, што ён уключыў у заяўку не наймацнейшых футбалістаў краіны, а тых, каго ведае асабіста і з кім працаваў раней. Камплектаванне праз знаёмства сапраўды мела месца, і гэта, вядома, не самы справядлівы спосаб напаўнення складу. Аднак дэ ля Фуэнтэ ўзяў на сябе гэтую рызыку! Ён абраў тых, хто будзе за яго аддавацца на поле. Тых, хто будзе ўдзячны за шанц, якога інакш, магчыма, яны ніколі не напаткалі б.
Фінальная гульня пачалася з таго, што іспанцы забралі мяч і загналі англічанаў на іхную палову, прымусілі абараняцца. Пад 15-ую хвіліну англічане падалі два кутнія, але тыя не неслі сурʼёзнай небяспекі браме, Англія адказала адным. Але мяч быў цалкам пад кантролем Іспаніі, на паўгадзіннай адзнацы валоданне мячом было 70 на 30 на карысць каманды дэ ля Фуэнтэ. Цікава, што да гэтага часу абодва галоўныя бамбардзіры камандаў, Ольма і Кейн, зарабілі кожны адное папярэджанне. Адзіны стрэл, што пацэліў у створ брамы, нанёс Фоўдэн, замыкаючы падачу са штрафнога, але галкіпер іспанцаў Сімон быў на месцы. На перапынак каманды пайшлі пры нулях на табло.
Не паспеў пачацца другі тайм, як Іспанія выйшла наперад і забіла гол. Мяч за тры перадачы быў умомант дастаўлены ў штрафную. Ольма адвёў двух абаронцаў, а Лямін Ямаль, якому 13 ліпеня споўнілася 17 гадоў, даслаў мяч на Ніка Ўільямса – і экс-хаўбек «Атлетыка» з Більбаў адправіў мяч у дальні кут. Вядома, што 22-гадовы футбаліст ідзе на павышэнне ў «Барсэлону», дзе будзе гуляць разам з Лямінам Ямалем. Адразу пасля голу іспанцы маглі забіць другі, але Ольма прабіў міма. Праз гадзіну гульнявога часу англічане знялі з гульні Кейна, а іспанцы – Марату. А забіць ізноў магла «Чырвоная фурыя», але пасля класнага ўдару Ямаля Англію выратаваў Пікфард.
Але раптам Англія вярнулася ў гульню, зраўняўшы лік у чацвёртым (!!!) матчы запар. На 72-й хвіліне Сака прастрэліў у штрафную, Бэлінгэм дацягнуўся да мяча і выкаціў мяч пад удар Коўла Палмэра – і форвард «Чэлсі» адправіў з-за межаў штрафной мяч у дальні кут. Гэты хлопец выйшаў на замену і ў гэтым сезоне ён забіў 25 галоў. Але перамога засталася за Іспаніяй. На 86-й хвіліне Іспанія забіла пераможны гол: Ольма запусціў у атаку яшчэ аднаго гульца «Чэлсі», Кукурэлля, які прастрэліў – і Мікель Оярсабаль прынёс Іспаніі золата «Еўра 2024».
Мікелю Оярсабалю 27 гадоў. Ён ніколі не хапаў з неба зорак, але гэта гулец добрага класу, апошнія 9 гадоў выступае за «Рэаль Сасьедад», не самы хвацкі іспанскі клуб, а з 2016 года яго сталі запрашаць у зборную Іспаніі. Ён згуляў за яе 36 гульняў і забіў 11 галоў. Гэта для Оярсабаля быў другі «Еўра», на мінулым ён спыніўся ў паўфінале, а таксама дабраўся да фіналу Алімпіяды ў Токіа. Цікава, што футбаліст можа згуляць на пяці пазіцыях.
Алесь Ляўчук belsat.eu
