Старшыня Гомельскага аблвыканкаму Іван Крупко 18 ліпеня выступіў са спецыяльным зваротам.
Улады дасюль не могуць справіцца з наступствамі ўраганаў, якія абрынуліся на Беларусь 13–14 ліпеня. Аляксандр Лукашэнка загадаў цалкам аднавіць энергазабеспячэнне да раніцы 19 ліпеня.
Старшыня Гомельскага аблвыканкаму Іван Крупко 18 ліпеня выступіў са спецыяльным зваротам да жыхароў рэгіёну: ліквідацыя наступстваў стыхіі не спыняецца ні ўдзень, ні ўначы. У аўторак уладам удалося падключыць да энергасістэмы ўсе райцэнтры, забяспечыць вадою паселішчы, дзе яе падачы не было, увесці ў строй усе жывёлагадоўчыя комплексы і пачаць запуск вымушана спыненых прадпрыемстваў. Цяпер, на раніцу 18 ліпеня, без электрычнасці застаюцца 307 паселішчаў у 11 раёнах вобласці.
Раней Міністэрства энергетыкі заяўляла, што аднаўленчыя працы вядуцца ў 293 паселішчах Гомельшчыны. Чаму лічбы ведамства і аблвыканкаму адрозніваюцца, невядома.
«На ўліку кожны дом. Нашая задача – максімальна за сёння, а самыя складаныя ўчасткі – да раніцы 19 ліпеня падключыць да крыніцаў сілкавання. У нас ёсць дакладнае разуменне, дзе ўдасца аднавіць падачу электраэнергіі, а дзе спатрэбіцца яшчэ час. Таму ўжо з панядзелка закупляем генератары, таксама атрымліваем іх у часовае карыстанне з іншых вобласцяў», – апавёў кіраўнік рэгіёну.
Крупко заявіў, што Гомельшчына атрымала 158 генератараў па лініі Мінэнерга, 246 набылі ў Менскага маторнага заводу. Сфармаваныя брыгады для іх падключэння і абслугоўвання.
,,«У цэлым гэта дае нам упэўненасць, што мы зможам засілкаваць энергіяй усе астатнія паселішчы. Графікі падключэння ў кожным раёне будуць апублікаваныя на інфармацыйных рэсурсах і ў СМІ неўзабаве», – падкрэсліў Крупко.
Паралельна, сцвярджае чыноўнік, вядзецца праца, каб развязаць праблемы сувязі:
«Учора «Белтэлекам» абсталяваў тэлефонную лінію, якая працуе без наяўнасці вонкавага энергазабеспячэння. У тых паселішчах, дзе адсутнічае сувязь, устанавілі па адным стацыянарным тэлефоне ў доме або ва ўстанове сацыяльнай сферы. У той жа час больш за 40 брыгадаў мабільных аператараў падключаюць вышкі да генератараў, каб як мага хутчэй цалкам аднавіць сувязь.
,,Паважаныя жыхары вобласці, мы зробім усё магчымае і немагчымае, каб да канца дня электрычнасць ува ўсіх нашых дамах была адноўленая».
Раніцаю 18 ліпеня Аляксандр Лукашэнка заслухаў даклад Івана Крупко пра ліквідацыю наступстваў урагану і загадаў развязаць усе праблемы з энергазабеспячэннем да раніцы 19 ліпеня.
Нагадаем: 13–14 ліпеня на Беларусь абрынуліся разбуральныя ўраганы. Шасцёра чалавек загінулі. Вялізарная колькасць паселішчаў засталася без электрычнасці і водазабеспячэння. Найбольш пацярпела Гомельская вобласць.
Глеб Нержын belsat.eu
