Становішча на фронце станам на 22 ліпеня.
«Белсат» аналізуе вынікі чарговага тыдня поўнамаштабнай вайны, распачатай Расеяй ва Украіне. Пра становішча на фронце станам на 22 ліпеня чытайце ў нашым матэрыяле.
На поўначы Харкаўскага раёну ініцыятыва застаецца за Збройнымі сіламі Украіны, якія ціснуць па ўсёй лініі сутыкнення, імкнучыся адкінуць праціўніка да дзяржаўнай мяжы. Пры гэтым іх асноўныя намаганні па-ранейшаму лакалізуюцца ў ваколіцах сяла Глыбокае: прарасейскія крыніцы адзначаюць, што ЗСУ ўдалося замацавацца на паўднёва-заходніх ускрайках населенага пункту, адкуль цяпер ідуць атакі на цэнтральную частку сяла.
У суседнім Чугуеўскім раёне баі маюць хутчэй сустрэчны характар: абодва бакі атакуюць у ваколіцах сяла Старыца, а таксама ў цэнтральнай частцы гораду Ваўчанск, аднак істотнымі поспехамі адзначыцца не могуць.
Разам з тым праўкраінскія крыніцы паведамляюць, што расейскае камандаванне сцягвае рэзервы да Глыбокага і Ваўчанску, рыхтуючыся да новага наступу на гэтых участках фронту. Імаверна, такімі дзеяннямі расейцы намагаюцца вымусіць праціўніка перакінуць яшчэ больш сілаў на паўночны фронт, што ў далейшым мае адгукнуцца на абароне ўсходу і поўдня. Пры гэтым відавочна, што УС РФ па-ранейшаму не прэтэндуюць на маштабныя прарывы на поўначы Харкаўшчыны, якія маглі б скончыцца захопам абласнога цэнтру. Нагадаем, паводле заходніх ацэнак, для штурму значна меншага Марыупалю ў 2022-ім годзе расейцы задзейнічалі не менш за 12 батальённых тактычных групаў, што складала прыкладна шостую частку ад усёй групоўкі, якая ўварвалася ва Украіну.
Адначасова з гэтым захоўваецца ініцыятыва Узброеных сілаў РФ у Купянскім раёне на паўночным усходзе Харкаўскай вобласці. Тут расейцы ціснуць з поўначы ад раённага цэнтру ў ваколіцах сяла Сынькоўка, а таксама ніжэй па фронце побач з Пішчаным.
На першым участку ЗСУ пакуль удаецца кантраляваць сітуацыю і часцяком самім дасягаць лакальных поспехаў. У гэты ж час пад Пішчаным становішча Сілаў абароны Украіны паступова пагаршаецца. У прыватнасці, у Міністэрстве абароны РФ заявілі, што населены пункт быў цалкам заняты іхнымі вайскоўцамі.
Праўкраінскія крыніцы пацвярджаюць кантроль праціўніка над большай часткай населенага пункту. Аналітыкі праекту Deepstate пішуць, што калі расейцы сапраўды занялі Пішчанае, то цяпер ад пераразання групоўкі ЗСУ на левым беразе ракі Аскіл іх аддзяляе адно поле і невялікае сяло Калісныкоўка. Магчымы выхад войскаў РФ да ракі істотна пагоршыць становішча групоўкі Збройных сілаў ва ўсім Купянскім раёне.
На суседнім ліманскім кірунку – захад Луганскай і поўнач Данецкай вобласцяў – расейцы імкнуцца стварыць плацдарм на правым беразе ракі Жарабец у ваколіцах сяла Макееўка, каб у далейшым пагражаць усёй сістэме абароны ЗСУ на рубяжы населеных пунктаў Церны – Ямпалаўка.
У гэты ж час украінцы намагаюцца стварыць свой плацдарм на поўдні кірунку на тэрыторыі Серабранскага лясніцтва, атакуючы па лініі Дзіброва – Кузьмыно – Крэмінная.
Пры гэтым агулам пакуль казаць пра істотныя поспехі любога з бакоў зарана.
Пагаршаецца становішча Збройных сілаў Украіны на так званым сівэрскім выступе па фронце, дзе расейцы паступова рухаюцца адразу з некалькіх кірункаў да аднайменнага гораду.
Так цягам тыдня войскі РФ прасунуліся на паўднёвым фланзе ад Раздолаўкі да Пэрэізнага, у выніку чаго таксама наблізіліся і да суседняй Выемкі з паўднёвага ўсходу.
Паралельна з гэтым расейцы рушылі на захад ад раней занятага Спірнага і захапілі сяло Івана-Дар’еўка: такім чынам удалося выпрастаць фронт з поўдня ад населенага пункту, а таксама падысці ўжо з усходу да Выемкі.
Улічваючы канфігурацыю фронту, выглядаюць лагічнымі далейшыя спробы Узброеных сілаў РФ падцягнуць паўднёвы фланг і ў бок сяла Фёдараўка, якое знаходзіцца на захадзе ад Пэрэізнага на дарозе Бахмут – Сівэрск.
На краматорскім кірунку, пасля выціскання ЗСУ з усходняй часткі гораду Часаў Яр, расейцы імкнуцца прасунуцца на паўночным і паўднёвым флангах, каб перайсці канал Сівэрскі Данец – Данбас і атачыць асноўную частку населенага пункту.
Украінскія вайскоўцы, якія абараняюцца на гэтых участках фронту, адзначаюць, што найбольш моцна праціўнік цісне на поўначы з ваколіцаў сяла Калінаўка.
У гэты ж час асобныя прарасейскія крыніцы сцвярджаюць, што войскі РФ ужо пераходзяць канал і намагаюцца за ім замацавацца.
У цэнтральнай частцы Данецкай вобласці Узброеныя сілы РФ развіваюць поспех на ўсходзе і поўдні тарэцкай агламерацыі. У прыватнасці, рух расейцаў фіксуецца каля самога Тарэцку, а таксама ў населеных пунктах Дружба, Паўночнае, Паўднёвае, Юр’еўка і каля Нью-Ёрку.
Пры гэтым у Мінабароны РФ заявілі, што Юр’еўка ўжо цалкам перайшла пад іхны кантроль. Акрамя гэтага ёсць паведамленні пра заняцце УС РФ прылеглай да сяла вышыні 180 метраў, што стварае добрыя ўмовы для далейшага руху на поўнач з мэтай атачэння групоўкі ЗСУ на тэрыторыі Нью-Ёрку.
На суседнім пакроўскім кірунку расейцы паступова прасоўваюцца на захад, наступаючы шырокім фронтам. Тут варта звярнуць увагу на захоп імі населенага пункту Прагрэс, у выніку чаго яны могуць працягнуць рух на паўночны захад у бок трасы Пакроўск – Канстанцінаўка і падтрымаць сваю групоўку, якая ўжо атакуе каля сяла Ваздвыжанка. Акрамя гэтага з Прагрэсу войскі РФ могуць пайсці на захад па хрыбце ўздоўж чыгуначнай лініі да Навагродаўкі.
Далей на поўдзень па фронце расейцы выціснулі праціўніка з цэнтральнай часткі Краснагораўкі, у выніку чаго ЗСУ адышлі на паўночны захад гораду. Акрамя гэтага фіксуецца невялікі рух войскаў РФ на поўначы ад суседняга сяла Георгіеўка. Разам з тым агулам на курахаўскім кірунку лінія сутыкнення застаецца больш стабільнай, аднак пастаянны ціск з боку праціўніка не дазваляе камандаванню ЗСУ перакінуць частку сілаў на поўнач – пад Тарэцк і Пакроўск.
На поўдні краіны Узброеныя сілы РФ працягваюць ціснуць на двух асноўных участках фронту – на так званым урэмаўскім выступе (на мяжы Данецкай і Запарожскай вобласцяў), а таксама ў ваколіцах гораду Арэхаў (цэнтральная частка Запарожскай вобласці), імкнучыся вярнуць пазіцыі, якія былі страчаныя летась падчас контрнаступу ЗСУ. Нягледзячы на вялікую інтэнсіўнасць баёў і лакальныя поспехі расейцаў, у прыватнасці, ім удалося заняць зруйнаванае сяло Ураджайнае на поўдні Данецкай вобласці, агулам лінія сутыкнення застаецца адносна стабільнай.
Больш дынамічна развіваецца сітуацыя на тэрыторыі Херсонскай вобласці, дзе расейцам удалося цалкам выбіць праціўніка з плацдарму на левым беразе Дняпра ў ваколіцах сяла Крынкі. Абарона гэтага ўчастку фронту далася вялікай цаной украінскаму баку, але, відавочна, мела выключна палітычны характар: камандаванне ЗСУ не спрабавала перакінуць вялікія сілы на левабярэжжа для далейшага наступу, замест гэтага доўгі час падтрымлівала плацдарм мінімальнымі сродкамі, чым у выніку і скарысталіся расейцы.
Цяпер жа ініцыятыва цалкам перайшла да Узброеных сілаў РФ, якія намагаюцца заняць большую частку астравоў у рэчышчы Дняпра. Акрамя гэтага існуе верагоднасць спробы стварэння УС РФ плацдарму на правабярэжжы. Аднак апошнія дзеянні таксама будуць мець выключна палітычны характар без прэтэнзіяў на рэальныя перспектывы.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
